Ang kalag sa kaso ni Michel ug Ecleo

Namatay na lang si Michel Favila ang nag-unang akusado sa kaso sa pagpatay ni Atty. Arbet Santa Ana Yonco pero ang iyang kaso wa pa gyod tawon mahuman. Nag abot na lang seguro ang kalag ni Michel ug Atty. Arbet ug nagpinikatay na didto sa laing kalibutan pero ang ilang kaso dinhi sa kalibutan wa gyod maghuman. Ambot lang ning atong hustisya porbidang langaya. Karon nga namatay na si Michel kinsa may konbiktohon ug silutan sa atong hukmanan ang iyang kalag?

Ning kamatayon ni Michel Favila, mitumaw ang akong kabalaka sa kaso ni Ruben Ecleo Jr. tungod kay otro pod ning kasoha. Porbidang dugayang nahuman. Ang akog mahurot na lang upod og kamatay ang mga testigo ning kasoha, unsa kahay dangatan sa nahabiling kabanay ni Alona?

Sa kadugay ning kaso ni Ruben Ecleo nagduda na hinoon ko nga ang prosecution naglisod gayod sa pag-prosecute ni Ecleo maong nagsige na lang og pagpa-inhibit sa mga huwes nga naghupot sa kaso nga ilang gidudahan nga atoa makapusta sa kampo ni Ecleo bisan kun kini way mga basihanan.

Misantop na hinuon karon sa akong huna-huna nga basin og gilipat-lipat lang ta sa prosecution. Nga ang mga lakang nila kaniadto sa pagpa-inhibit sa mga huwes, usa kadto ka paagi sa paglingla kanato aron kun ang hukom sa husgado pabor ngadto kang Ecleo dili sila basulon sa katawhan nga kanunay nga nagtukaw sa pagbantay sa dangatan sa kaso.

Dili kaha ang simpatiya sa katawhan mao na lay ilang tumong karon sa prosecution aron kun dili makuha ang hukom nga pabor kanila, ang katawhan mosimpatiya kanila ina kay atong basulon? Hinaut pa unta nga di ni mao ang ilang laraw.

Ang kaso ni Ruben Ecleo Jr. gikatakdang padayonon karong sunod buwan. Hinaut, di na ta magpaabot pa og laing pito ka tuig o pila pa kakatuigan aron paaboton ang pagpakanaug sa hukom sa iyang kaso. Himoon na unta ang dinaliang hukom ning kaso ni Ruben Ecleo Jr.