Bonggang panihapon

Nagpadayon ang kontrobersiya bahin sa "bonggang panihapon" ni Ate Glo ug mga kauban didto sa Amerika. Gitawag nga "bongga" ang maong panihapon kay mikantidad man og P1 million ang chit.

* * *

Wala kaayo -- at least, sa pagsuwat niini, wa pa -- maka-esplikar ang kampo ni Ate Glo ... Nagpusot-pusot ang pagpanaway. Naay batikos gikan sa obispo, naa say gikan sa sundawo, politiko, komunista, media, common tao.

* * *

Bisan nangatarongan na ang mga tigpamaba ni Ate Glo nga dili siya maoy nibangka sa panihapon sa luho nga Le Cirque ug dili sapi sa gobyerno ang gibayad, ang mga kritiko nagkahiusa sa ilang punto de vista: Nga katong bongga nga panihapon imoral.

* * *

Imoral kuno tungod kay daghan sa mga pamilyang Pinoy ang hapit dili makakaon og bisag makausa lang sa usa ka adlaw ... Ug daghan ang manguykoy sa basurahan aron mamasin nga makakita'g ilang makaon.

* * *

"Unta," matud ni Dr. Araceli Nietes, "gipraktis ni GMA ang virtue nga gitawag og delicadeza." Nga sa ato pa, "midumili siya sa pagpahigayon sa maong makabungog nga panihapon tungod kay dinhi sa atong nasud daghan ang gutom."

* * *

Gawas sa P1 million nga panihapon didto sa Le Cirque gikataho nga ang entourage (barkada?) ni GMA nangaon sab sa Bobby Van's Steakhouse sa Washington D.C. diin nakagasto sab kini, sumala sa balita, og P718,000.