Salamat Tita Cory

Ugmang adlawa walay trabaho ug walay klase kay ang Malakanyang mideklarar sa Agosto 5 nga usa ka Special non-working holiday kay lubong sa icon of democracy nga si kanhi pangulong Corazon "Cory" Aquino. Si Tita Cory mibiya kanato 20 ka adlaw sa dili pa nato saulogon ang pagpatay sa iyang bana nga si senador Benigno "Ninoy" Aquino. Si Ninoy gipatay sa dihang mikanaug na kini sa eroplanong iyang gisakyan pagpauli dinhi sa Pilipinas kaniadtong Agosto 21, 1983.

 Tugoti nga sa iyang pagpanaw ipabawon ko ni Tita Cory ang ako ug ang inyong mga pasalamat. 

 Salamat Tita Cory. Salamat nga amo kang nakaplagan. Salamat nga nahimo ka namong pangulo. Salamat. Salamat usab Ginoo nga gihatagan mo kami og Cory Aquino. Salamat Tita Cory sa demokrasya nga imong gibilin kanamo.

Sa imong pagpanaw nagbangotan ang katawhang Pilipinhon. Sa imong pagbiya nagbakho ug nagdangoyngoy ang walay mga tingog samtang mitiyabaw ug mihagolhol ang mga adunay tingog sa katilingban nga imong gibiyaan.

Salamat sa imong kadasig, sa imong determinasyon, sa imong pagpangulo nga adunay moralidad nga maoy nag aghat kanamong katawhan sa pagsunod sa imong pamunoan sa way pagkusmod. Salamat.

Sa mga wala pa masayod ilabi na sa mga bag-ong tubo, si Tita Cory ang icon of democracy. Siya ang usa sa mga nangona pagpahibalik ug pagpalig-on sa demokrasya sa nasud. Siya ug mga kaubanan ang mihatag ug mitunol kanato pagbalik sa demokrasya nga gitagoan ug gihikaw ni Ferdinand Edralin Marcos sa diktador niyang pamunoan.

Busa angay ug matarong lamang gayod nga sa pagpanaw ni Tita Cory ngadto sa laing kalibotan atong ipabawon kaniya ang atong mga pasalamat ug mga pag-ampo tungod sa daghang mga kaayohan nga iyang gibilin kanato.