Usa ka Sugbuanon, finalist sa World Bank Essay contest

Niay maayong balita alang kanatong mga Pilipino, samtang daghan kanato nag-assess ug nagtimbang-timbang pa kun tinuod bang nagmalambuon ang atong nasud sumala sa bag-ong SONA sa presidente, tulo ka batan-ong Pinoy nakahatag kanato’g kadungganan sa ilang pagdaug sa 2009 International Essay Contest sa World Bank.

Ang World Bank Essay Competition gihimo matag tuig, nga nagtumong sa panginlabot sa mga batan-on sa tibuok kalibutan nga nagpangedaron og 18 hangtud 25.

Karong tuiga kapin sa 2,000 ka entries ang gisumiter gikan sa 150 ka nasud, 90 porsyento niini gikan sa developing countries.

Niining kapin sa 2,000 ka entries, tulo ka entry sa mga Pinoy migulang mananaug, ug laing walo nakalandig sa kategoriya nga “best submitted,” diin ang Pilipinas nakaangkon sa labing daghan nga mga top entries kauban sa Indonesia.

Di ka ma-proud ini, Dro? Ang tulo, sila si Victor Marco Emmanuel Ferriols sa University of the Philippines-Visayas, sa video category, giulohan “Losing shores, losing more”; Jernalyn Gayon sa Western Mindanao State University sa Zamboanga City, third place, sa iyang mga retrato (photograph category), nga naghulagway unsaon pag-sponsor og usa ka scholar pinaagi sa pagkolekta og mga plastic nga botelya; ug Miguel Antonio Garcia sa University of San Carlos ning atong dakbayan, napiling finalist sa essay category, giulohan “Stepping Up To The Challenge: The Cebuano Youth in the Climate Change Crisis.”

Akong usbon, kapin sa 2,000 ka mga entries gikan sa 150 ka nasud, ug nakasulod ang igsoon tang Sugbuanon. Ug ang laing walo nga giila nga best submitted nga mga essay, video ug photograph, gikan nila ni Denise Margaret Matias, Maria Angela Abad, Paul John Gesa, Reah Gonzales, Jan Michael Jose, Vincenso Molejon, David Michael San Juan, ug Luthi Raditya Soekartawi, usa ka Indonesian nga nagpuyo dinhi sa Pilipinas.

Ato ning ginganlan dinhi, tingalig duna moy paryente, ug aron usab paghatag og panig-ingnan sa atong mga batan-on, nga ang mga batan-ong Pinoy karon dili tanan badlongon. Ang topic karong tuiga: “How does climate change affect you? How do you tackle climate change through youthful solutions?”

Hagit sa mga batan-on. Kaya natin ito. I thought that our youth today have frustrated Jose Rizal when he said that the youth is the hope of the fatherland. Ikaw, Dro, pila bay edad nimo ron, hope ka ba, o liability sa atong nasud?