Tingog sa mga botante

Karon pa sukad masukad nga daghang sektor sa katilingban ang nilihok aron pag-aghat sa mga bag-ong mga botante nga moparehistro. Karon pa mahitabo sa kasaysayan sa piniliay sa nasud nga usa ka tuig palang sa di' pa ang eleksyon, nagsugod na ang pagsaba-saba sa mga tawo o mga grupo nga nagpakabana. Karon pa sa kasaysayan sa nasud nga gipalihok ang tanang kwalipikado moboto nga mobisita sa Comelec aron moparehistro. Ug sukad niadtong unang EDSA people power revolution karon pa nahitabo nga taas ang interes sa mga Pinoy nga botante nga aduna gyuy eleksyon nga mahitabo. Karon pa nagkalapad ang tumong sa publiko nga pulihan na ang kasamtangang pamunuan.

Di' nato mabasol ang katawhan nga buot nang may mahitabong piniliay karon o ugma gyud dayong adlawa. Dungan sa paglukapa sa approval rating ni presidente Arroyo, mao 'sab ang pagsaka sa interes sa katawhan nga makapili na'g bag-ong mamuno sa atong nasud. kining tanan, nagpakita lang unsa ka diskontento ang mga Pinoy sa pamaagi nga gihimo sa kasamtangang gobyerno pagpadagan sa nasud. Makaluluoy paminawon nga bisan pa sa paningkamot sa presidente, ubos lang gihapon ang iyang approval rating. Kun ang mga taga Malacanang ang pangutan-on, ilang giklaro nga wa' nay mas grabe pang motrabaho nga presidente gawas ni Mrs. Arroyo. Apan nasapawan ang iyang mga kakugi sa mga pasangil sa kahiwian nga gihimo sa iyang bana, mga suod nga tawo sa iyang palibot o mismo niya. Ang di' pagtingog o paghatag og katin-awan sa matag isyu ang nakapasamot sa mga kalagot batok sa kasamtangang administrasyon. Kausaban na ang singgit karon sa kadaghanan.

Apan hangtud kanus-a ang maong tinguha? Makaabot pa ni sa eleksyon sunod tuig? Matod sa Commission on Elections, siyam ka milyon ka mga bag-ong botante ang gipaabot nga morehistro alang sa piniliay sunod tuig. Apan kapin tulo ka buwan sa di' pa ang katapusang adlaw sa pagparehistro, mag duha ka milyon palang ka mga bag-ong botante ang nipanon sa buhatan sa Comelec. Nigawas ang maong numero bisan sa paningkamot sa daghang sektor sa katilingban pag-aghat sa mga bag-ong mga botante nga magparehistro. Ang Boto Mo, Ipatrol Mo sa ABS-CBN sa iyang bahin, naka-aghat na og libuan ka mga bag-ong botante nga di' lang mamahimong aktibo sa pagbantay sa ilang boto apan labaw sa tanan, kinahanglan gyud silang magparehistro aron makaboto.

Sa miaging semana, gibisita ang Sugbo sa Rock the Vote o Register and Vote. Tumong sa grupo ang pag-aghat sa mga bag-ong botante nga magparehistro gamit ang musika sa mga banda nga maoy lingguwahe karon sa kabatan-onan. Apan kining tanan nga mga paningkamot wa' ra katunga sa mas dako pang panginahanglan sa mga bag-ong mga botante. Karon, tumong sa grupo nga awhagon ang Comelec nga sugod Oktobre, alas siete sa buntag hangtud alas siete na sa gabii ang pagpanawat sa mga bag-ong magparehistro. Sa maong lakang, wa' nay rason ang si bisan kinsa nganong wa' makaboto.

Apan di' lang ang kakuwang sa interes ang hinungdan nganong ubos gihapon ang number of new registrants. Sa lungsod sa Tudela sa isla sa Camotes, maayo nalang og may usa ka bag-ong botante ang magparehistro matag adlaw. Ang gasto sa pletihan nga mokabat og halos singkwenta pesos, gipili sa mga tawo nga ipalit nalang og bugas o ipabawon sa anak nga nagtungha inay igasto aron maka-abot sa buhatan sa Comelec sa lungsod. Ingon niini kapait ang kahimtang sa mga botanteng Pinoy—susamang mga botante nga nangindahay og kabag-ohan sa pagpadagan sa atong gobyerno—susamang mga tawo nga ingon og sa gihikawan sa kahigayonan.

Luyo sa paningkamot sa pag-edukar sa atong mga botante, naghulga gihapon batok niining tanan ang gahum sa salapi ug impluwensya. Pila ba ka mga botante unya nga makalimtan ang ilang prinsipyo ug idolohiya tungod kay nasilaw na sa salapi nga ipalit sa ilang boto? Pila ba ka botante unya nga singhag sa politiko, dali rang motalaw ug itugyan ang katungod, di' sa iyang konsensya apan kahadlok sa kandidato nga iyang napangayoan og maayong kabubut-on. Bisan sa mga pagduda ug mga kabalaka, malaumon gihapon ko nga may nagpaabot nga kabag-ohan sa atong proseso sa eleksyon sa nasud. Wa'y nahibawo nga basin sa Mayo sunod tuig na ang sinugdanan sa dugay nang gipangandoy nga kabag-ohan.

* * *

Email: [email protected]