Ang bintaha sa pagsul-ob og sotana

Tungod sa pagtulis patay kang Father Jovencio Rabusa nabanhaw pagbalik ang panawagan kaniadto nga pasul-obon og sotana ang mga pari kun manggawas kini sa simbahan. Gitug-an man ugod sa usa sa mga tulisan nga dili unta nila mahimo ang krimin kun nasayod pa sila nga pari ang ilang nabiktima.

Apan hugot nga gisupak sa kaparian ang pagpasul-ob kanila og sotana gawas sa simbahan. Nagkalain-lain na lang ang rason sa ilang pagsupak sa nabanhaw nga sugyot. Ang usa ka pari mirason nga alimoot kaayo kun kanunay silang magsul-ob og sotana samtang ang laing pari miingon nga mura na unya kuno sila’g white lady tan-awon kun magabii. Aduna usay midason dili sulbad sa krimin ang pagpasul-ob kanila og sotana.

Tinood ang pagpasul-ob sa atong kaparian og sotana samtang manggawas sa simbahan dili makasulbad sa krimin apan makapaminos kini. Gani nagtoo ko nga wa na gyod unya’y pari nga mabiktima sa krimin kun magsul-ob sila og sotana tungod kay bisan unsa ka salbahis ning mga kriminal motahod man gihapon ni sila og pari.

Ang pagpasul-ob og sotana sa atong kaparian di lang kini makapaminos sa krimin batok sa mga pari kun dili makapaminos usab kini sa krimin nga mahimo sa ubang kaparian ngadto sa ilang bokasyon. Mominos na gyod unya ang gidaghanon sa ubang mga pari nga makapabuntis ug hilom nga makigpuyo sa mga babayeng ilang mapabuntisan.

Gawas pa, moubos ug mahanaw na gyud pod unya ang ubang mga pari nga mosuyop og shabu kay di na man makabisita sa Pasil ug ubang dapit nga mapalitan og ginadiling drugas. Mahanaw na upod unya ang ubang mga pari nga sugarol, wa na unya ta’y makitang pari nga magkupay sa pitsas sa mga madyongan kay mauwaw namang magkupay samtang nakasotana. Di ba? Di ba Father?

Busa usbon ko, ang sotana dili lang makapaminos sa krimin batok sa atong kaparian, makapaminos usab kini sa ubang pari nga mohimo og krimin sa ilang bokasyon. Tinood, ang sotana dili makapawagtang sa krimin batok sa atong kaparian apan makapaminos kini.