Ang lider

Way duha-duha magpapili gayod pag-usab sa pagka presidente si kanhi presidente Joseph Ejercito Estrada matud pa ni Senate president Juan Ponce Enrile. Kamatuoran niini namalit na si Erap og duha ka helikopter ug mga van aron gamiton sa pagpangampanya.

Si Presidente Gloria Macapagal Arroyo makadaghan nang higayon nga mibisita sa iyang lalawigan sa Pampanga ilabi na sa ikaduhang distrito niini agi og pagpangandam sa iyang pagpapili pagka-kongresista sa nahisgutang distrito ning moabot nga bugnong logaynon sigon sa pamahayag sa iyang mga kontra sa politika.

Tungod niini si kanhi Senate President Jovito Salonga miawhag sa duha sa dili pagpadayon sa ilang mga tinguha. Sugyot ni Salonga ngadto kang Erap ug Gloria - ihatag ngadto sa mga batan-on ang kahigayonan sa pagdumala sa nasud, ihatag niadtong wa malambigit ang pangalan sa pagpangawkaw sa bahandi sa nasud.

Ang bugnong lugaynon nagkaduol busa mopili na upod unya kita og presidente sa nasud mao nga aduna ako'y idugang sa sugyot ni Salonga ug kini akong isugyot ngadto sa katawhan. Kun ugaling dili maminaw si Erap ug Gloria sa sugyot ni kanhi Senate president Jovito Salonga kay magpapili gayod sila: sa pag-abot sa bugnong lugaynon pilia ninyo ang lider, ayaw pilia ang politiko.

Ang lider dako og kalainan sa politiko. Ang lider maayo samtang ang politiko dautan. Ang lider naglantaw sa kaayohan sa iyang ginsakpan o katawhan samtang ang politiko naglantaw lamang sa iyang kaayohan. Ang lider dili kurakot samtang ang politiko kurakot.

Sa mga una nang pangalan nga nagpadayag sa ilang pagpapili sa pagka-presidente sa nasud, aduna pa ba kanilay lider?