Panguwarta sa maestro

Usa ka magbabasa ning lindog nga naggamit sa cell. no. 0907-2054964 mi-text nako niadtong September 7, 2008 (Sent: 07:05:14 pm) kay gusto niyang mabulgar ang modus operandi sa panguwarta sa usa ka magtutudlo.

Well, in fairness ngadto sa maong magtutudlo, dili lang una nako ibutyag ang kompleto niyang ngalan. Taguon lang una nato siya sa inisyal nga Mr. FP. Nagtudlo ni siya sa usa ka national high school sa North District sa dakbayan sa Sugbo.

Sumala sa alegasyon sa atong texter, kining maong maestro magsige’g pangayo og amotan sa mga estudyante pero iya rang ibolsa ang kuwarta nga iyang makolekta. Unya kun pangitaan na gani o pangayoan nag balanse sa mga ginikanan, magpakuyap-kuyap kuno dayon aron dili na mahinayon ang pagtuki. (Artistahon sab diay ning maestroha!)

Ang anak mismo sa atong texter nakasulay sa maong maestro. Nahagbong gyud (kuno) ang iyang anak sa subject nga P.E. kay wala man siya mohatag og P100. Ug sumala sa atong texter, dili pud eligible ang maong maestro.

Mahimong may personal nga kayugot ang atong texter ngadto sa maong maestro tungod sa pagkahagbong sa iyang anak sa P.E. subject. Pero dili angay i-discount ang iyang mga alegasyon nga nanguwarta sab gayod ang maong magtutudlo. Angayan kining subayon og i-counter check sa kadagkoan sa DepEd.

* * *

"Good day. Kining drug pushers sa Bato, Ermita nagsige ra man ni sila sa ilang binuang. Madakpan man tuod pero mabuhian lang pod dayon. Duol ra kaayo diri sa usa ka presinto pero wala nahimo ang mga polis. 85% nay akong pagtoo nga involve sad ni sila. Naa tinuo'y nangadakpan pero wala may nasilotan." -- 0906-9045488 (Sent: 12:22:52 pm--Sept. 8, 2008)

Usa kini sa makapahisagmuyo hunahunaon. Maong dili gyud masumpo sa hingpit ang mga badlongon sa katilingban kay kun madakpan, makabuhi ra man sab. Mora’g igo lang silang mobakasyon sa bilanggoan. Morag lugak ra gyud kaayo ta sa pagpatuman sa atong mga balaod.

Maong usahay, dili ta makabasol kun may mga tawo nga nawad-an nag pagsalig sa sistema sa atong hustisya.

 (Sumbong ug reklamo? Text sa 0910-8105522).