Pacman: Simbolo sa kahiusahan

Gipakita ug gibarogan gayod ni Ricky Hatton ang tawag kaniya nga “Hitman” tungod kay sa una pa lamang hugna sa boxing kanunay na siya nga na “hit” sa mga nagpungasing kumo ni Pacman. Tungod sa kanunay nga pagka “hit”, mitikang-kang gayod si Hitman sa ikaduhang hugna sa ilang kombati ni Pacman didto sa MGM Grand sa Las Vegas, Nevada sa Amerika. Duha ra ka round si Hitman human kupogi og maayo ni Pacman.

Tungod sa fight ni Pacman kaniadtong adlaw’ng Domingo dinhi sa Pilipinas, mingminos na usab ang sakyanan nga mibiyahi sa kadalanan, mingminos ang gidaghanon sa mga tawo nga naglaag-laag sa kadalanan, mingminos ang krimin ug mingminos usab ang gidaghanon sa mga tawo nga nanimba sa mga simbahan. Bisan ang misa sa alas tres sa hapon sa Santo Rosario Church nga kanunay nga magsobwak ang mga manimbahay mingkunhod ang mga nanimba. Gani ang pari nga maoy magmisahan sa maong oras dili upod mao ang mi-preside sa misa. Wa upod kaha motan-aw ang pari nga tigmisahan sa maong oras sa fight ni Hatton ug ni Pacman?

Tungod sa fight ni Pacman ang mga sundawo ug mga rebelde wa sa magpinusilay, ang mga militanteng grupo mihunong   sa ilang mga protesta, ang mga kriminal sa pipila ka suok sa nasud mihunong sa ilang dautang kalihokan ug ang mga nagduwa sa Palaro didto sa Tacloban mihunong sa kay mitan-aw ni Hitman ug Pacman.

Tungod niini dili na gayod nato ikalimod nga usa ka simbolo sa kahiusahan si Pacman dinhi sa nasud. Hinaut nga di niya usikan ang dakong pagtahod sa katawhan pinaagi sa pagsulod sa way hinungdan nga politika dinhi sa Pilipinas.

* * *

Ang mga otoridad kinahanglan nga di magkompiyansa sa mga opisyal ug politiko nga miadto sa Nevada aron pagtan-aw sa away ni Pacman ug Hitman kay basin og may dala kini nga Influenza A H1N1.