Karong Semana Santa...

Namungingi na sa kadaghan sa mga tawo ang mga pilgrim site sa Sugbo karong Semana Santa. Ang uban, gituyo ang pagsayo sa paghimo og ‘station of cross’ sa mga bukirang bahin sa Sugbo aron di’ maapiki sa sakyanan karong Huwebes ug Biyernes. Managlahi man ang ilang gi-ampo atol sa ilang pagbisita sa mga pilgrim site, apan susama ang buot nilang ipadangat sa Kahitas-an atol ning mga adlaw sa kasakit—ang pagsakripisyo ug pag-ambit sa pasyon sa Ginoo aron matubos ang tanan sa kasal-anan. Sa pagdugok sa mga tawo sa mga hilom nga lugar, malaumon silang ingon niini usab unta ang tumong sa gobyerno o sa atong katilingban—nga bisan sa makadiyot atong malimpyohan ang atong huna-huna gikan sa nagkaguliyang nga panghitabo sa palibot.

Usa sa mga gidugok sa katawhan ang mga monasteryo sa lungsod sa Carmen. Gawas nga hilom ang maong dapit ug mas duol ka sa kinaiyahan tungod kay ana-a sa bukid nahimutang ang mga monasteryo, mas epektibo ang imong pag-ampo ug pagpangaliya. Adunay onse ka mga monasteryo sa maong lungsod nga pwedeng mabisita karong Semana Santa. Imong maangkon ang kahilom o ka-solemne sa lugar tungod kay wa’ gitugot ang pagsaba-saba sa dapit bisan pa sa pagdagsa sa gatosan ka mga tawo. Pwede nimong mabisita ang Rosary Center, ang nag-inusara sa tibuok nasud. Dinhi pwede kang mag-ampo sa rosaryo atubangan sa hulagway sa nagkada-iyang misteryo. Imo ‘sab nga makita sa usa sa mga monasteryo ang labing dako nga imahen ni Sr. Sto. Niño.

Matag monasteryo, adunay simbahan o kapilya nga sa imong pagtan-aw palang mangangha naka tungod sa kanindot sa disenyo ug kalimpyo sa dapit. Adunay mga monasteryo nga gihatagan og kagawasan ang ‘religious group’ nga maka-atubang sa mga tawo. Apan adunay mga monasteryo nga gidili sa mga miyembro ang pag-atubang o pagpakita sa mga tawo. Ang nakalahi sa lugar tungod kay gawas nga gihatagan ka sa kahigayonan nga mag-ampo, aduna ‘sab ka’y higayon nga magpa-ampo kanila. Ang nakanindot sa lugar tungod kay pulos maayo ang tumong sa mga tawo nga nibisita sa lugar hinungdan nga dako ang kahigayonan nga makahimamat ka og mga bag-ong kaila o higala.

Higpit ang seguridad sa mga mingaw nga lugar sama sa Carmen. Di’ buot sa mga pulis nga mokompyansa tungod kay posibleng dagsaon sa mga tawo nga may dautang motibo ang mga lugar sama sa mga monasteryo atol sa Semana Santa. Istrikto ‘sab ang seguridad sa Q park sa lungsod sa Compostela. Gawas sa daghang guwardiya, may mga sakop sa Regional Mobile Group nga gipakatap sa lugar aron pagsiguro nga luwas ang mga tawo nga mobisita sa dapit. Sa miaging tuig, nakatala ang Q park og kapin sa usa ka gatos ka libo ka mga deboto gikan sa Sugbo ug sa mga silingan nga lalawigan sa Leyte ug Bohol. Aduna sa’y mga balikbayan nga di’ sipyaton ang pagduaw sa dapit karong Semana Santa. Sagad sa mga tawo nga moduaw sa lugar, nagbitbit sa ilang mga bawon ug uban nga gamit.

Tumong sa Q park ang pag-imbitar lang unta sa mga tawo nga maghinuklog sa ilang mga sala. Apan tungod sa kanindot sa dapit, gawas nga libre pa, adunay uban nga gipili nga sa maong lugar nalang matu’g gamit ang bitbit nilang ‘camping gear’ sama sa tent ug uban pa. Tungod kay nahimo nang usa ka tradisyon sa mga magbarkada ug magpamilya, aduna nay mga lugar nga gi-andam ang mga taga Q park nga pwede ka butangan sa ilang mga tent ang mga tawo. Sugod niadtong Lunes Santo, gidagsa na sa daghan nga deboto ang dapit ug gilauman nga mas modaghan pa ni ugmang adlaw hangtud na sa adlaw’ng Domingo.

Apan ang simbahan nitataw, wa’ sa kanindot sa mga dapit nga bisitahon o sa mga kauban sa pagduaw sa lugar ang labing mahinungdanon karong Semana Santa. Ang tanan, masukod lang sa kasinsiro sa usa ka tawo sa pagduaw sa mga pilgrim site ug kaligdong sa pag-ampo sa Kahitas-an ning panahon sa Semana Santa. Matud sa simbahan, mas labing maayo kun ang tanang semana sa tuig ang himuong sagrado. Giklaro sa simbahan, angayan nga ang pagsakit, pagkamatay ug pagkabanhaw lang ni Jesukristo ang sentro sa kinatibuk-ang okasyon ug wa’ nay lain pa. Sa maong paagi, mas makahinuklog ka unsa ka bililhon ug di’ masukod ang gugma sa Ginoo kanatong tanan bisan kun unsa ug kinsa pa ang atong pagkatawo.