Itakwil ang rebolusyon

Mga pagbabago’y hangad nang marami

Nagsisigawan pa sa gitna ng kalye;

Ang akala nila — hangari’y mabuti

Pero itong bansa ang naduduhagi!

Ang gusto ng iba tayo ay mag-aklas-

Rebolusyon. Rebolusyon! Sigaw na malakas;

Kung ito ang nais bansa’y mawawasak

At lalong darami lumuluhang anak!

Kung tayo’y sasali sa mithing ito

Mga buhay natin ay paralisado

Daming nagsasarang establisemento

At lalong darami ang walang trabaho!

Batid nating lahat hirap na ang bansa

Dahil sa maraming makain ay wala;

At kung tayong lahat ay pabigla-bigla

Sa masamang layon lalo pang kawawa!

Paano ngang ito’y hindi mangyayari

Tayong mamamaya’y lalong maaapi;

Dahil rebolusyon mithi nang marami

Sa usok ng digma’y magdadalamhati

Dahil sa mapusok na mga damdamin

Tiyak g’yera sibil ating daranasin;

Sariling gobyerno ang kakalabani’t

Babaha ng dugo sa baya’t bukirin!

Kung magsasagupa ang dalawang panig –

Tayong mga Pinoy ang maliligalig;

Sundalo’t sibilyan kapag nagkalapit –

Buhay ng marami tiyak mapapatid!

Kahi’t anong sama ng ating gobyerno

May pag-asa pa rin tayong Pilipino;

Kaya ang rebelyon sa panahong ito

Huwag nang isipi’t tumahimik tayo!

Sa eleks’yon na lang tayo’y makiisa

Ang piliin nati’y may mabuting diwa –

Ang puso ay ginto’t ang tanging adhika –

Tayo’y lumigaya’t bansa’y sumagana!