Logging sa Bohol

"Good day. Concern lang ko diri sa Bohol. Grabe man ang illegal logging diri. Ang nakaapan kay ang nahingtungdang ahensiya sa kagamhanan wa man magpakabana. Alaot mi diri sa umaabot nga mga adlaw. Wala nay dagkong kahoy nga makatabang kun adunay mga pagbaha. Diri ni sa Getafe ug Inabanga, Bohol." -- 0927-9428206

Kun tinuod ning imong gisumbong, higalang texter, labing maayo nga mopadangat kag sumbong ngadto sa kagamhanan lokal sa inyong dapit. Mahimong mosumbong ka ngadto sa lokal nga mga opisyal sa Getafe o sa Inabanga mahitungod niini.

Basin diay wala silay kasayoran bahin sa illegal nga pagpamuril sa mga kahoy diha sa Getafe ug Inabanga -- kun aduna man gyu’y ingon niini nga kalihokan, maong wala kini maaksiyoni.

Aron matagad kag dali, maoy duola ang mga municipal councilor nga maoy chairman sa Committee on Environmental Management.

* * *

"Sir, naa lang koy ireklamo kalabot ning tunghaang high school sa Pulpogan, Consolacion, Cebu. Morag dili maayo ang gibuhat nila sa mga estudyante kay ang bayad sa testpapers tag P30.00 kay kuno ang uban ini isuweldo sa utility nga maoy molimpiyo sa ground ug opisina nila. Ang uban pa ani ibayad pa kuno sa tubig nga gi-supply sa eskuylahan. Ug karong bag-o gikolektahan na pod og tag P14.00 kada usa ang mga estudyante kay ipalit og hollow blocks aron ikoral sa eskuylahan. Maayo unta masusi ni sa DepEd." -- 0922-5275296

Para nako, dako ra nang bayranan sa testpapers nga P30.00. Kana hinuong ubang mga kontribusyon, okey ra man kana basta dili lang compulsory. Giklaro sa DepEd nga walay compulsory contribution sa mga publikong tulunghaan. Pulos lang voluntary contribution nga sa ato pa, walay pugsanay.

Usahay sab magkasabot ang mga ginikanan ug magtutudlo nga sakop sa PTCA sa pagtampo-tampo alang sa usa ka proyekto sa eskuylahan ug uban pang katuyoan. Okey ra kini basta dili lang lagi pugsanay.

Sa laing bahin, bukas kining lindog alang sa pagpasabot sa mga magtutudlo sa high school diha sa Pulpogan sa ilang habig.

* * *

 (Sumbong ug reklamo? Text sa 0910-8105522).