Salamat sa aksiyon

Akong pasalamatan ang kadagkuan sa kapolisan dinhi sa dakbayan sa aksiyon nga gihimo sa reklamo sa usa ka Alrich Rasma pinaagi sa akong lindog niadtong Enero 12 batok sa giingong mga sakop sa kapolisan nga protector sa illegal nga kalihukan diha sa Barangay Sawang Calero.

Sa suwat ni Supt. Aniceto Perandos pinitsahan of Enero 14, iyang gipahibawo nako nga ilang giimbistigar ang maong reklamo basi sa akong lindog. Wa nako hinganli ang maong mga pulis apan matud ni Perandos sa iyang suwat nga ilang nasuta nga ang maong mga pulis mao sila si SPO1 Jaime Militar ug SPO1 Henry Orbiso.

Si Militar anaa madistino sa San Nicolas Police Station samtang si Orbiso nadistino sa Homicide. Nagkanayon si Perandos nga way basihanan ug butang-butang ang pasangil ni Rasma batok sa duha ka mga pulis.

Pagmatuod nga di protector si Militar sa illegal gambling, matud ni Perandos nga ang maong polis maoy nagsilbi nga giya atol sa usa ka saturation drive nga ilang gihimo niadtong Disyembre 10, 2008 diin upat ka mga video karera machine ang ilang nasakmit.

Gisusi na sab kuno sa Station 6 ang pasangil nga dunay karera sud sa compound nila ni Militar ug Orbiso apan wa sila’y nakita. Bisan hinuon kun negatibo, apan gipasalig ni Perandos nga magpadayon ang ilang imbestigasyon batok sa mga pulis nga gidudahang protector.

Gihagit sa kapolisan dinhi sa dakbayan si Alrich Rasma sa pagpatim-aw ug ipresentar ang imong ebidensiya atubangan sa kadagkuan sa kapolisan dinhi sa dakbayan. Akong dasunan ang maong hagit.

* * *

Sa makausa pa gisaulog sa kabomberohan ang fire prevention month karong buwan sa Marso. Ang tinuig nga pag-obserbar sa fire prevention month akong nabantayan nga mao say higayon nga mosaka og maayo ang gidaghanon sa mga sunog.

Ang kabomberohan unang mipasabot nga kini tungod sa kainit sa panahon atol sa maong buwan. Apan ang di nako masabtan nganong dinhi ra man pud sa dakbayan, nganong wa may mga sunog nga atong madunggan didto sa kalungsoran?

Dili kaha dunay ahensiya nga nagpasagad dinhi sa dakbayan mao nga sagad sa mga sunog dinhi mahitabo? Nangutana lang ko tungod kay alang nako di man gud kasarangan ang pagdaghan sa mga sunog panahon sa Marso.

Lain nako nga nabantayan matag higayon nga dunay sunog, sagad nga hinungdan sigun sa imbestigasyon sa kabomberohan mao ang “electrical short circuit.”

Kun ingon niini ang sagad nga hinungdan, buot ba nga ipasabot niini nga nagpabaya ang mga opisyal sa Office of the Building Official ug ang kabomberohan sa ilang trabaho? Atol sa pagtukod og panimay kinahanglan gyud ang approval sa OBO aron pagsiguro nga gisunod ang hustong lagda apan nganong sagad sa mga sunog wiring man sa kuryente maoy hinungdan?

Di kaha ni timailhan sa dugay nang kultura sa korupsiyon diha sa OBO nga mamahimo nang way inspection kun duna lay padanglog?

* * *

[email protected]