Ang kakak sa World Bank

Human mamasangil sa kagamhanan sa Pilipinas nga gipaburot ang kontrata sa mga proyekto nga ilang gipundohan, ang World Bank nahisama sa usa ka himungaan mikalit lang og kakak.

Human mangisog nga aduna gayod silay basihanan sa ilang mga pasangil nga nangorakot ang unang ginoo Mike Arroyo ug mga kaubanan sa mga proyekto nga ilang gipundohan, milikoy na karon ang World Bank. Wa kuno direktang gilambigit sa ilang report nga nanapi ang Unang Ginoo.

Ngano kaha nga mikakak man ang World Bank? Nahadlok kaha sila nga hinginlan kay squatter lang sila dinhi sa nasud? Pero nganong mahadlok man sila nga alas man ang ilang gihuptan batok sa kagamhanan sa Pilipinas? Ang pagkapalautang sa Pilipinas mao ang alas nga gihuptan sa World Bank. Ang Pilipinas ambisyoso hinungdan nga kini palautang busa mahadlok nga dili pautangon sa World Bank.

Ang atong kagamhanan nangambisyon sa pagpatukod og dagkong mga proyekto bisan walay pundo nga kuwarta para niini mao nang modayon sa pagpangutang sa World Bank ug International Monetary Fund. Busa dili kini angayan nga mokakak sa kagamhanan sa Pilipinas.

Kun dili tinood ang report sa World Bank nganong ila man kining gihimo? Tumong ba niini ang pagdaot lamang sa imahin sa kagamhanan ni Pangulong Arroyo? Nganong buot man kini nilang himoon? Si kinsa ba ang nagsugo sa World Bank? Si Ping Lacson o si Barrack Obama?

Maayo unta og di na ta pautangon sa World Bank ug ubang mga international financial institution aron di na mosamot kadako ang atong utang kay sa pagka karon bisan ang mga bata nga wa pa ipanganak utangan nang daan sa World Bank ug International Monetary fund.