Modus sulod sa jeep

Niay estilo sa modus operandi sa mga badlongon sa katilingban nga angay ninyong bantayan. Ang nakadiskobre niini mao ang usa ka nagpakabana nga texter. Kining maong estilo sa modus anha mahitabo sulod sa PUJ. Aron inyong masabtan pag-ayo, akong ipatik ang katibuk-an sa text nga akong nadawat nga nagbutyag ning maong paagi sa binuang.

"Good day, Sir! Naa koy nakita nga modus sa mga badlongon sulod sa jeep nga pasaheroan. Ambot kun bag-o ba kini nilang kalaki. Ang iyang style kay maglingkod siya luyo gyod sa driver. Unya mag-andam siya og sensilyo. Kunohay siyay tigdawat sa mga plite sa mga pasahero. Apan ang nakapait kay kun naay madawat niya nga tingob ang uban iyang kupiton. Wala gyo’y kalibotan ang driver. Sa akong tan-aw morag daghan siyag makupit. Ako untang sitahon ugaling lang kay diha koy dala nga bata niadtong higayona. Lisod na kun magkagubot, maangin unya ang bata. Pero segurado ko nga daghan silang nagbuhat og ingon ini nga tinonto." -- 0927-8188669 (Sent: 01:36:15pm--July 22, 2008)

Daghang salamat sa imong pagpakabana, higalang texter. Kining maong estilo sa modus operandi angay bantayan sa mga PUJ driver kay sila ang direktang mabiktima ning maong matang sa binuang.

Simple ra kaayo kining maong estilo sa modus pero epektibo kaayo. Ang uban tingaling mga driver nasayod ug nakamatikod na niini. Apan alang sa uban nga wala pa masayod, angay silang magbantay ning maong estilo sa modus operandi sa mga badlongon sa katilingban.

* * *

"Sir, naay mga rugby boys diha sa MacArthur. Naa gyod sa may Gothong dapit. Manglabni ra ba kun sabog na. Tan-awon man lang sa mga tanod diha." -- 0916-7548486 (Sent: 01:45:22pm--July 22, 2008)

Pulpol diay ang mga tanod diha sa maong dapit kun tinuod man nga maghinan-aw lang sila sa mga rugby boys nga manglabni.

Walay pagpakabana og natulog lang sa pansitan ang maong mga tanod kun tinuod man nga wala silay gihimong lakang batok rugby boys.

Hoy, gising!

 (Sumbong ug reklamo? Text sa 0910-8105522).