Gamay ra'g suweldo

Mao kini ang sentimento sa kadaghanan sa akong mga magbabasa sa higayon nga maghisgot ko’g panarbaho. Timailhan kini nga daghan gyud ang atong kaigsuonan nga wala makapahimulos sa minimum wage nga gilatid sa atong balaod.

Usa ka texter nagkanayon: "Dugay na ko nagtrabaho pero gamay ra ang akong suweldo. Tag P100 ang adlaw. Usa ka export company nga gipanag-iya ni NU (inisyal). Kun masipyat mi’g gamay papirmahon dayon mi’g blangkong papel ug wala kuy SSS. Kun moanha ang taga labor dili mi maka-estorya kay ang iya rang sinaligan ang moatubang ug moingon ngadto sa taga labor nga minimum ang suweldo namo. Kun moreklamo mi sa among employer manghulga nga iya ming potbolon." -- 0910-3653529 (Sent: 08:56:13 pm--November 17, 2007)

Mao kini naka-unfair sa kinabuhi. Ang mga pobre wala gyo’y dag-anan sa mga dato. Tiaw mo kana! Tag P100 rang adlaw ang suweldo sa atong texter. Unya kun moreklamo sila ngadto sa employer, hulgaon silang taktakon sa trabaho bisan walay igong kapasikaran. Pastilan baya, uy.

Kun maoy atong tuhoan ang pamahayag sa texter, atong makita nga daghan kaayo’g kalapasan nga nahimo ang iyang employer. Utokan sab ang maong employer maong dili masakpan sa taga labor. Mao nga angay sab magmaigmat ang taga labor aron mabuking nila ang mat-an pas pinya nga mga employer.

* * *

"Nagtrabaho ko diri sa Kagudoy, Lapulapu City. Barato kaayo ang suweldo, tag P110 ang adlaw. Kun ma-reject ang akong trabaho tungod sa depektosong kinhason dili ko bayran. Ang Hapon nga employer nako way klaro. Ang iyang secretary utro sang corrupt." -- 0919-8927747 (Sent: 03:37:58pm--November 18, 2007)

Barato ra gyud ang maong suweldo kun ikaw usa ka empleyado sa imong gitrabahoan P250 na ang minimum karon. Ug nganong dili ka man bayran kun ma-reject ang imong gitrabaho nga dili mo man sala kun depektoso ang materyal? Makahimo ka pagreklamo niini kay dili maayo ang gihimo sa imong employer.

* * *

 (Sumbong ug reklamo? Text sa 0910-8105522).