Sinugatan sa Bag-ong Tuig

Di maayo ang tilimad-on sa tuig 2009 tungod kay gisugat ni sa mga dugoon ug ngilngig nga krimin. Gibuksan ang bag-ong tuig sa pagpusil patay sa usa ka lechon dealer didto sa barangay Lahug nga si Methusael Inesola niadtong Disyembre 31 sa gabii samtang linga ang katawhan sa pagmaya pagsugat sa 2009.

Human sa maong krimin gisundan ni sa dugoon nga pagpanulis sa asawa sa usa ka Overseas Filipino Worker didto sa dakbayan sa Mandaue ug sa pagtulis sab sa usa ka dealer og softdrinks diin mokabat og kapin sa duha ka milyon ang nasakmit sa mga tulisan.

Gisundan pa gyud ang maong mga krimin sa laing mas ngilngig nga pagpatay sa duha ka mga bata sud sa usa ka apartelle diha sa Barangay Capitol Site diin ang responsabli nga si Felix Ortiz naghikog sab human sa krimin.

Usa sa duha ka mga bata nga iyang gipatay mao ang iyang kaugalingong anak nga babaye nga nagpangidaron pa lang og singko anyos. Selos maoy gituohan nga motibo sa krimin.

Niadtong Martes mas nakugang ang Sugbo sa nahitabong pag-ambush sa usa ka piskal didto sa Barangay Mambaling. Si Assistant City Prosecutor Patrick Osorio nakabsan gyud sa kinabuhi human sa dul-an sa 24 oras gikan siya banhigi sa wa pa mailhi nga mga mamumuno.

Si Osorio nagbilin og upat ka anak sa lima ka buwan niyang mabdos nga asawa. Ang kamatayon ni Osorio naghatag og kabalaka sa mga piskal ug mga abogado tungod kay posibling mahiagom sab sila sa susamang linuog nga krimin.

Apan luyo sa ilang kabalaka wa maghuna-huna ang mga piskal nga mangayo og police escort. Matud ni City Prosecutor Nicolas Sellon nga dili “feasible” ang pagbaton sa matag piskal og body guard tungod sa kakuwang sa mga polis.

Ang uban nila nagtuo sab nga way labot sa trabaho ang pagpatay ni Osorio tungod kay way kontrobersiyal o bug-at nga kaso nga gihuptan ang piskal. Apan lahi ang nakit-an sa mga imbistigador.

Gani atol sa tigum sa mga imbistigador uban sa mga piskal niadtong Miyerkules sa gabii, dunay kasong gihuptan si Osorio nga posibling maoy hinungdan sa krimin. Nagdumili hinuon sila sa pagtug-an kung unsa ang maong kaso sa kabalaka nga makabantay ang mga responsabli.

* * *

Ang pagbanhig ni Osorio nakabanhaw sa mga tinguha nga hingpit na idili dinhi sa dakbayan ang paggamit og helmet nga motabon sa nawong. Kini tungod kay sagad sa mga kriminal magsakay og motorsiklo ug magsul-ob og helmet aron matabonan ang ilang nawong.

Nunot sa hitabo dali nga mipasar og resolution ang CITOM board niadtong Miyerkules nga nag-awhag sa konseho sa dakbayan nga mopalabang og ordinansa nga mag dili sa pagsul-ob og helmet nga motabon sa nawong.

Si konsehal Jack Jakosalem miingon nga iya na nga gi-draft ang ordinansa nga siya maoy mangamahan.

Sayod hinuon ko nga di ni garantiya nga masanta na ang mga krimin nga binuhatan sa mga tawo nga luwan og motorsiklo ug magsul-ob og helmet apan uyon ko sa argumento nga makatabang ni aron pagpugong sa mga kriminal.

Alang nako ang labing importante nga sulbad sa problema mao ang dinalian nga kasulbaran sa mga krimin nga binuhatan sa mga nagsakay og motorsiklo tungod kay pinaagi niini mahadlok gyud ang mga kriminal nga mohimo og krimin.

Usa man gud sa problema nganong isog kaayo ang mga kriminal nga mohimo og krimin mao ang kapakyas sa atong mga awtoridad pagsulbad.

* * *

[email protected]