Sticker kuno

Gikan sa cell. no. 0926-5666893: "Good AM, Sir. Maong wala masumpo ang mga jeep Mandaue nga mosulod sa Jones kay naay sindikato ana. Naay sticker na sila nga gipikit para dili dakpon. Tag P500 bayad ana kada semana sa ilang member. Duwa na sa Citom ug ubang polis nga sakop nila. Nakahibalo kaha ang mayor ana?" -- (Sent: 08:35:36 am--Sept. 21, 2008)

Dili lang una ko mokomentaryo bahin niini. Ang rason nganong gipatik ko kining maong sumbong mao nga aron makaabot kini ngadto sa mga nahingtungdan ug masuta kun tinuod ba kini o dili.

Bukas kining lindog alang sa ilang pagpasabot sa ilang habig. Mangayo tag explanation sa Citom mahitungod niini. Human unya nato masayri ang ilang side, mohukom kita kun nakahimo ba silag iregularidad o wala.

* * *

Good day, Sir. Reklamo lang ko about anang bag-ong manindahay diha sa kilid sa simbahan sa Naga City. Maayo unta nga masusi kana sa market supervisor kay wa nay mga permit. Dagko kaayog mga puwesto. Luoy kaayo ang mga karaan manindahay nga naa na nuon sa private nangabang. Maayo unta limpiyohan nang lugara kay nakaali sa mangagi." -- 0905-8168938 (Sent: 08:47:13 am--September 22, 2008)

Mamasin ta nga naay taga market administration sa Naga City nga makabasa niining imong text ug maaksiyonan ang imong concern.

Moawhag sab ko nimo, higalang texter, nga mas maayong pangunayan mo ang pagpadangat sa imong reklamo ngadto sa market supervisor alang sa dinaliang aksiyon.

* * *

Akong awhagon kadtong gustong mopadangat og sumbong ug reklamo dinhi sa Modus nga palihog, ayaw ninyo i-abbreviate og maayo ang inyong text kay lisod kaayong sabton.

Tingalig masipyat ta kun dili masabot ang inyong text. Dili gyod ta makapangomentaryo labinag wala nato hisabti sa hingpit ang unod sa inyong mensahe. Kun sobra ka-abbreviated ang text ug dili masabtan, dili gyod kini mahatagan nato og pagtagad.

Salamat sa pagsabot.

(Sumbong ug reklamo? Text sa 0910-8105522).