Ang mga inday-lipay

Niay modus operandi nga angay bantayan labina niadtong mga lalaki nga mahiligon mogamit sa mga inday-lipay o mga babaye nga mugbo og lupad. Adunay mga burikat nga mamiktima sa ilang mga kustomer.

Ang estilo niining maong mga inday-hilay mao nga lipayon nilag maayo ang ilang kustomer aron kini kapoyon ug makatulog sulod sa mabugnaw’ng lawak sa motel human sa makutas nga kombate sa kama.

Sa higayon nga makatulog ang kustomer, hutdon niya’g sakiyo ang tanang kuwarta ug valuables sa iyang kustomer dayong sibat.

Ang ubang inday-hilay mokontak sa ilang bugaw samtang atua sila sulod sa mabugnaw’ng lawak uban sa ilang kustomer. Iniggawas sa kustomer, hold-apon siya sa bugaw. Ang inday-hilay maoy mangitag paagi nga matigayon gayod ang pagpanulis.

Daghan na ang nahitabo niini busa pagbantay kamo.

* * *

“Good day. Ang akong usa ka vendor sa sidewalk usa ka miyembro sa kapunongan nga LAVO. Ang kapunongan mangobra og tag P10 isip bayad sa puwesto bisan dili unta angay kobrahan. Mahimo na hinuon tang utangan nila. Sus, grabe na ang panguwarta unya ang mga miyembro wala masayod asa padulong ang kuwarta.” -- 0909-5268186 (Sent: 12:07:45pm-- Oct. 8, 2008)

Kun legal ang pagpangolekta, okey lang kana, labina’g gikasabotan kana sa mga sakop sa kapunongan. Nagkulang lang tingali sa pagpasabot mahitungod niana ang mga tigpasiugda sa koleksiyon.

* * *

“Kini bang mga taxi driver diri sa Pier 4 mag-standby dapit sa may Gothong, gihimo na man nilang terminal nang dapita. I-double parking pa gyud.” -- 0910-9552542 (Sent: 10:34:15pm-- October 8, 2008)

Angay ning susihon sa traffic division kun wala ba makahimog violation kanang mga taxi driver nga mo-parking dihang dapita.

Aksiyon!

* * *