Gipangga ang mga senior citizen sa Makati

Sa una natong lindog, atong gibatbat ang mga kaayohan nga gitunol sa dakbayan sa Makati ngadto sa ilang mga senior citizen, pagpakita sa ilang pagtamod ug pag-ila nga kun unsa karon ang Makati, kini gumikan sa mga paningkamot sa nag-una kanilang katigulangan karon – hinungdan nga daku ang ilang pagtahod sa ilang mga senior citizen.

Dugang sa mga benepisyo nga ato nang gihisgutan, ang mga medical assistance naglangkob ning mosunod:

1. Tulo ka ambulance team (mga doctor ug mga nurse) ang i-dispatch sa city hall aron pagduaw sa mga bedridden nga senior citizens sa barangay; pag-conduct og mobile laboratory services, paghimog referral sa mga masakiton ngadto sa tukmang ahensiya sa kagamhanan, ug paghatud sa mga masakiton ngadto sa hospital.

2. Alay sa Katandaan program. Ang matag viernes gideklarar nga Senior Citizens’ Day sa mga health center sa dakbayan, diin himoon ang diagnostic screening, annual bone density test, pap smear, breast examination, counseling bahin sa hustong pagkaon (diet) ug pag-exercise. Mamaligya usab og mga discounted nga mga pneumonia vaccine ug 50% nga discount sa mga maintenance drugs, sama sa anti-hypertensive, anti-diabetic, ug anti-osteoporosis.

3. Makati Health Plus program. Free treatment/hospitalization sa Ospital ng Makati (dinhi sa ato, ibaligya na hinoon ang city hospital). Ug libre ang Philhealth coverage IDs.

4. P3000 death benefits; ug P15,000 worth of memorial services, including coffins to members sa ilang foundation nga gitukod.

Unya, dugang niining tanan, matag kasaulogan sa Chinese New Year, kapin sa 1000 ka senior citizens ang i-treat sa usa ka merienda cena sa daku nilang parke, sponsored sa mga five-star hotel sa Makati. Mahimo kaha ni nato dinhi sa atong dakbayan, Dro?

Ug, duna pa silay Free Cultural Show, Senior Olympics, Free livelihood & training seminar – tudloan ang mga senior citizen paghimog sabon, kandila, food processing, basic computer ug call center lessons, ug uban pa. Naa pay libre nga ballroom dance lessons. Nindota no?

On top ining tanan, ang mga chapter president adunay allowance, ug hapit na ang tanang barangay hall adunay gigahin nga opisina sa mga senior citizen, manned by the seniors themselves. Dinhi sa atong queen city of the south, unsa man? Morag way labut sa barangay ang mga senior citizen.