Kini maoy maayo

Gihulagway sa uban nga gubot ang sesyon sa mga konsehal sa Mandaue kay naglantugi kini kun aprobahan ba nila o dili ang gipangayo ni Mayor Jonas Cortes nga dugang P205 milyones nga supplemental budget.

Kadtong wala kaayo masuheto sa tukmang kalihukan sa pangagamhanan makaingon g’yod nga gubot, apan alang sa nasayod sa husto nga trabaho sa mga konsehal modayeg hinuon kanila.

Gitandi nako ang mga konseho sa dakbayan sa Sugbu nga ang mga sakop pareho ra nga kauban sa administrasyon ug ang konseho sa Mandaue nga mas daghan ang sa oposisyon.

Mas gusto ko nga ang konseho duna g’yod unta’y patas nga gidaghanon sa mga konsehal. Sa ato pa, katunga sa administrasyon ug ang katunga sa oposisyon.

Pinaagi niini, ang tanang mga gitinguha nga gasto sa usa ka local government units mahashasan gyud og maayo kun angay ba kini nga suportahan.

Sama sa dakbayan sa Sugbu, daghan kaayo nga mga dinagko nga gasto, usahay tag P3 milyones ihatag lang sa usa ka kahugpongan nga wala gani sutaa kun ang gihatag nila sa miaging tuig nahimoan na ba og kwentada basi sa state audit procedures.

Unsaon nga magpangikog man ang mga konsehal nga mokuti-kuti sa ila rang kauban, ilabi na kun dili kini larino nga mohatag og pagpasabot. Sa laktud, molusot ra ang mga gasto nga angayan pa unta nga tan-awon pag-ayo.

Sa Mandaue, midayeg ko. Ang konseho nga gipangulohan ni Bise Mayor Carlo Fortuna ug ang ubang sakop sa oposisyon mihimo g’yod sa ilang katungdanan.

Dili man maisip nga pagkuti-kuti ang ilang gihimo aron lang g’yod nga dili makapatuman sa gitinguha nga proyekto ang administrasyon ni Mayor Cortes.

Gibasa nako pag-ayo ang detalyado nga report sa akong kaubang reporter nga si Flor Perolina, nasabtan nako ngano nga wala dayon aprobahi sa mga konsehal ang tinguha sa mayor.

Nahibulong man god sila si Bise Mayor Fortuna kay si Mayor Cortes buot na usab mangayo og pagtugot nga magahinan og supplemental budget sa ato pa dugang gahin sa iyang administrasyon, bisan duna nay dakung pundo nga gigahin sa annual budget.

Tukma lang nga ang oposisyon mangayo og pagpasabot ngano nga magpagahin na usab sila og laing minilyon ka pesos nga gastohan. Basin baya og giabusohan lang tinuod ang maong gasto.

Buyno, gitataw sa oposisyon nga kun makaesplekar si Mayor Cortes sa kamahinungdanong gasto nga ilang gipangayo, dili sila magpadiki-diki sa pag-aprobar niini.

Tan-aw lagi nako, nindot g’yod ang konseho nga dunay igo-igong gidaghanon sa oposisyon. Suway ra god mo og tambong sa sesyon diri sa dakbayan sa Sugbu, dili ba magduka mo.

Kun duna man gani’y ginagmay nga binayloay sa argumento, masabot nimo nga gipaagi na sa “script” ug gisabotan nang daan sa caucus sa wala pa ang sesyon. Dili ba tinuod?

Akong awhagon sila si Bise Mayor Fortuna sa pagpadayon sa maayo ninyong serbisyo isip mga fiscalizer diha sa Mandaue. Dugangan nato kini pagtuki ugma.

Pasensya lang mo kay mubo ra man god ang pahina nga gitagana nato mao nga kun batbaton nato pag-ayo sa usa lang ka higayon, dili maarang.

* * *

Saludo ko sa mga sakop sa Squatters Prevention Encroachment Elimination Division (Speed) nga gipangulohan ni Major Vicente Mercado kay giaksyonan dayon ang atong isyu nga gituki adtong Miyerkules.

Salamat Sir ha? Dili kini panugo ang ako, pagpahinumdom lang sa ilang kaakohan ug tahas nga mao ang pagpahapsay sa atong agianan nga giabusohan sa uban.