EDITORYAL – Olympics sugdan na

Sugdan na karong adlawa ang ika-29 nga Olympics didto sa Beijing, China. Giingon nga mao kini labing dako nga summer Olympics sukad sa pagmugna niini baynte-nuebe na ka tuig nga milabay.

Sa gihapon, ang Pilipinas mipadalag mga atleta kinsa makigtigi sa nagkadaiyang duwa batok sa 10,708 ka mga laing atleta gikan sa 205 ka mga nasud sa kalibutan.

Naninguha kita nga makasakmit og bisan usa na lang ka bulawan nga medalya nga sukad-masukad wala pa nato maangkon.

Usa ra kita ka menor nga partisipante sa Olympics apan ato kining gipasigarbo ang atong pagsalmot tungod kay sa ingon nakatampo kita sa pagkab-ot sa tinguha sa Olympiada nga ang kanasuran dinhi sa atong planeta magkahiusa.

Kay dili ba nga diha sa panaghiusa mapatunhay ang kalinaw sa kalibutan?