Sugal sa baraha

"Good day, Sir. Naay sugal sa baraha nga tong-its diri sa Tayud,  Consolacion, Cebu. Naa sa Purok Pag-utlan, kilid sa El Pueble Village. Dugay na ning sugala. Naa poy mga ginikanan diha wala gyod kabadlong sa ilang mga anak nga moapil sa tong-its," -- 0926-5189857 (Sent: 09:09:25am--April 9, 2008)

* * *

Atong sangpiton ang atensiyon sa kapolisan sa Consolacion sa pagsubay niining maong sumbong. Nasayod kong daghan kaayo mog buluhaton pero mas maayong gahinan pod ninyog panahon ang pag-counter check niining kasayoran nga gipadangat sa usa ka nagpakabanang molupyo mahitungod sa dugay nang operasyon sa sugal diha sa Purok Pag-utlan, Tayud, Consolacion, Cebu.

Mihatag man og eksaktong lokasyon ang atong texter kun hain dapit ang sugal busa nagtuo ko nga dili kamo maglisod pagsubay niini. Malipay gyod ang taga Tayud kun inyo kining aksiyonan.

* * *

Ang naggamit sa cell. no. 0928-4921283 mi-text nako sa makadaghan aron ipamugos ang iyang baroganan bahin sa shortchanging. Uyon kuno siya sa shortchanging, labinag 25 cents lang, kay alang kaniya ang kaayohan sa usa ka negosyante mao ra man ang pagbaligya og mga produkto ngadto  sa mga kustomer.

Pagkahagoka sa iyang rason. Kataphaw sa iyang pagsabot. Kun tukion god pag-ayo, serbisyo ang gitanyag sa mga negosyante ngadto sa mga kustomer. Nan, unsaon man nila paghatag og hingpit nga katagbawan ngadto sa mga kustomer pinaagi sa ilang serbisyo kun ilang tikasan ang maong mga pumapalit sa ginagmay nga paagi? Pastilan!

Tinuod nga may mga higayon nga mahimong hatagan natog konsiderasyon ang mga tindahan nga dili makasukli og 25 cents kay dili man sa tanang higayon nga abunda ang 25 sentabos. Pero maayo lang kana sa usa o duha ka higayon. Kun magpirme na lang, dili na kana angay pang i-tolerate.

Kun pasagdan god nato nga kanunay’ng kuwangan og sukli sa mga tindahan, basin higadman kita og dili nalang gyod sila mangitag paagi nga makakuhag daghang 25 cents nga ikasukli. Atong hinumdoman nga ang shortchanging gi-discourage sa DTI. Ang shortchanging dili gyod maayong buhat sa negosyante. Ang MODUS adto gyod modapig sa welfare sa mga konsumedor bisan magkinaunsa man.

* * *

(Sumbong ug reklamo? Text sa 0910-8105522)