Ayaw'g tinapolan

Husto kayo ang awhag ni Bise Mayor Mike Rama ngadto sa mga kapitan sa kabarangayan nga moabag sila pagtan-aw kabahin sa mga development projects ug mga quarry operations sa ilang dapit.

Sutaon nila kun duna ba kini’y permiso gikan sa mga ahensya nga hingtungdan ug kun wala gani, ireport nila aron kahimoan og tukmang lakang.

Gihimo kini sa bise mayor ang maong awhag tungod sa nahitabo nga pagdahili sa yuta didto sa bukirang barangay Mabini nga ang pamilyang Adarna nagmugna og development project nga walay permiso ug nakaapekto sa katawhan sa maong dapit.

Tuod man, dihang mibunok ang kusog nga uwan, midahili ang yuta sa maong development project kay kun duna pa kini’y permit, awhagon man g’yod sila sa kagamhanan nga tumanon ang tukmang lagda.

Dayon, ang ilang proyekto kanunay’ng i-monitor sa mga kawani sa maong ahensya kun gituman ba ang gilatid sa balaud aron nga dili kini makahatag og kadaut sa katawhan.

Tiaw mo nga ang karsada didto sa maong dapit nga agianan sa mga tawo nga magtumod og mga abot sa kaumahan ngadto sa kamerkadohan nababagan na man hinoon.

Kabahin sa kapitan sa barangay Mabini dugay na siya nga mireport ug nangayo’g tabang sa City Hall kabahin sa maong problema, apan gitugyan kini sa mayor ngadto sa City Attorney’s Office.

Ang nasuk-an ni Mayor Tomas Osmeña kay si acting city attorney Rodolfo Golez dugay kaayo nga nakahuman sa paghimo niya og lakang sa maong isyu.

Tan-aw nako angay lang nga si Golez hulipan ni Osmeña sa katungdanan. Nahibulong bitaw ko nganong kini si Golez nga usa sa mga assistant city prosecutors mao may gikuha sa mayor nga acting city attorney.

Kaming mga sakop sa media wala g’yod makagusto aning Golez kay gawas nga dugay makahimo’g aksyon sa mga isyu nga ma-refer sa iyang buhatan, dili pa gayod mohatag og impormasyon ngadto sa media.

Nagpareho lang ni sila si Orlando Secretario nga consultant for investigation ni Osmeña nga magpadiki-diki paghatag og impormasyon sa media.

Nakalimot sila nga ang media maoy nagrepresentar sa katawhan kay mopahibalo sa mga gihimo sa ilang mga gisweldohan. Nakalimtan nila nga ang sweldo nga ilang gidawat matag kinsena, gikan sa buhis sa katawhan.

Wala masayop si Rama pag-ingon nga kun ang mga opisyal sa kabarangayan mohimo lang sa tukmang trabaho, walay mga illegal nga buhat nga molungtad diha sa ilang barangay.

* * *

Buyno naghisgut na man g’yod ta og mga kawani sa dakbayan, apilon na lang nako pag-awhag kining mga gisweldohan isip mga consultant nga motrabaho g’yod unta.

Daghan sa mga tawo nga gikuhang consultants nag-usik-usik lang sa kwarta nga gibayad kanila kay walay mga trabaho. Dili uro’y mo gabaan no nga modawat og kwarta nga wala ninyo patui og singot.

Pagka wala g’yoy uwaw tawon nga magngisi-ngisi nga moatubang sa konseho sa dakbayan matag higayon nga magpa-renew sa ilang kontrata nga wala g’yoy trabaho.

Sama sa uban diha nga consultant sa mga konsehal, apan kun tan-awon nimo ang ilang accomplishments, wala g’yoy agi. Ayaw na lang ko pugsa pagpatug-an kay basin og mauwawan mo.

Bilib ko sa ubang consultant sa mga konsehal, sama sa higala nako nga si Jose Glenn Capanas ug uban pa, nga matag sesyon naa g’yod nga andam dayon mosanong kun dunay panginahanglan ang konsehal nga giserbisyohan nila isip consultant.

Ang uban g’yod kay bisan sa adlaw nga gikinahanglan sila aron nga moatubang sa konseho pag-renew sa ilang kontrata dili gani makatunga. Dili ba tinuod Konsehal Jun Pe?