Makauulaw’ng binuhatan

Dako nga sagpa sa imahe sa medical propesyon sa nasud ang nahitabo nga kontrobersiya diha sa Vicente Sotto Memorial Medical Center dili pa lamang dugay. Nagpaila lamang kini nga nagkulang gayud sa propesyonalismo ang pipila sa atong mga doktor ug nurse sa ilang gipanumpaang misyon.

Dili na nato ikatingala nga grabe na ang pagkagusbat sa imahe sa medical propesyon sa nasud taliwala sa international community. Kini naggumikan usab sa nagkadaiyang kontrobersiya nga gikalambigitan sa pipila ka mga anaa sa mga maong industriya.

Una nang nabulabog ang medical profession sa Pilipinas sa dihang miulbo ang giingong naghitak nga leakage sa eksaminasyon sa nursing pipila na ka tuig ang nakalabay. Kini miresulta sa retake sa liboan ka mga nurse sa nagkalainlaing lugar sa nasud kinsa nadamay sa maong kontrobersiya.

Ang grabe nga kontrobersiya sa leakage nakapahagba sa pagsalig sa kalibotan sa kapabilidad sa mga nurse sa nasud. Ug kini maoy angay nga hatagan og pagtagad sa mga namunoan sa industriya aron sa ingon mobalik ang pagsalig sa internasyonal nga komunidad.

Gani, wala palabya ni Teri Hatcher, ang usa sa mga sikat nga bida sa popular nga “Desperate Housewives,” ang panahon pagbiaybiay sa mga Pinoy nga doktor. Matud ni Hatcher sa usa sa mga episode sa maong sitcom nga buot niyang sutaon ang kredensiyal sa doktor nga maoy mohiling kaniya basin og gikan unya kini sa way klarong hospital sa Pilipinas.

Hinuon pwerte natong karakara pagbatikos sa maong pasundayag sa insulto nga dala niini sa mga Pinoy. Liboan ka mga Pinoy didto sa Estados Unidos ug sa ubang suok sa kalibotan ang grabe nga nakaprotesta ug midemanda og apology gikan kang Hatcher ug sa producer sa maong sitcom tungod kuno sa ilang giingong pagbugalbugal sa medical profession sa Pilipinas.

Apan ang realidad mao nga dili nato ikalimod nga dako gayud ang pagkatiurok sa imahe sa medical profession sa Pilipinas karong panahona. Gumikan usab kini sa kalambigitan sa pipila sa mga kontrobersiya nga naghatag hinuon og lama sa maong propesyon.

Dili usab nato mabasol ang uban nga moyam-id na lamang sa kapabilidad sa atong mga doktor ug nurse. Dili nato sila mabasol kun ubos ang ilang paglantaw sa medical profession sa nasud. Kini gumikan usab sa pipila ka doktor ug nurse sa nasud kinsa nagpabaya sa ilang misyon paghatag og ligdong nga serbisyo ngadto sa katawhan.

Sa nahitabo sa usa ka pasyente nga giingong gibugalbugalan sa mga staff sa VSMMC atol sa iyang pagpailalum sa operasyon pagkuha sa spray can nga mihuot sa iyang lubot, daghan na hinuon ang nabalaka nga basin kun sila na usab ang sunod nga mabiktima sa pagkawalay respito sa pipila sa maong propesyon.

Angay lamang nga dili palabyon sa mga hingtungdang ahensiya sa kagamhanan ang pagkawalay batasan niadtong mga doktor ug nurse nga miatiman sa maong pasyente. Ug angay lamang usab nga adunay silot kadtong ilang dili makatarungano’ng binuhatan.   

Ang labing dako nga isyu sa maong kontrobersiya dili ang pag-butang sa maong video sa operasyon sa Internet kondili ang pagkawalay puas nga bugalbugal nga gibuhat sa hospital staff ngadto sa maong pasyente.

Sa mao nilang binuhatan sulod sa operating room, klaro nga nawala ang propesyonalismo niadtong mga doktor ug nurse. Mora na hinuon og baka kadtong ilang gi-operahan tungod sa ilang ka langas nga mora ba og tua sila sa slaughterhouse niadtong tungora.

Ug kinahanglan gayud nga manubag sila sa ilang makauulaw nga binuhatan gumikan kay naghatag lamang kini og dakong disgrasya sa medical profession sa Pilipinas.

* * *

Ipadala inyong reaksiyon [email protected]