Curfew ordinance  vs. Juvenile law

Gisugyot ni Sr. Supt. Patrocinio Comendador, hepe sa kapulisan sa dakbayan sa Sugbo ngadto sa mga opisyal sa Barangay nga ipatuman sa hingpit ang Curfew Ordinance aron mahipos ug maminosan ang gidaghanon sa mga minor de edad nga naglaroy-laroy panahon sa kagabhion nga maoy nakamugna sa pipila na ka mga kaguliyang dinhi sa dakbayan. Apan dili uyon niini si kapitan Eugenio “Jingjing” Faelnar sa barangay Guadalupe ug presidente sa ABC tungod kay mobangga kini sa Juvenile Law. Gisugyot hinoon ni Faelnar ang pag edukar sa mga ginikanan mahitungod sa pagbantay sa ilang mga anak aron dili na kini maglaroy-laroy panahon sa kagabhion. Kining maong sugyot ni Faelnar gisuportahan usab sa mayor.

Ang pagpatuman sa Curfew Ordinance sigon sa sugyot ni Sr. Supt. Pat Comendador usa sa mga maayong sulbad niining mga minor de edad nga kanunay nga nalambigit sa mga kagubot panahon sa kagabhion busa angayan unta kining suportahan sa atong mga opisyal sa barangay diin naa kanunay mahitabo ang mga kagubot. Isip Chief Executive, hugot usab unta kining ipatuman ni Mayor Tomas Osmeña.

Ang pagpatuman sa Curfew Ordinance dili kini makabangga o makasungi sa gipatuman nga Juvenile Law tungod kay sigon sa akong nasabtan ang nahisgutang balaod nagdili lamang sa pagsikop ug pagposas sa mga minor de edad, wa kini magdili sa paghipos kanila. Ang pagsikop lahi ra sa paghipos sa mga minor de edad. Ang paghipos sa mga minor de edad ug pagdala niini ngadto sa barangay hall aron adto kini ipakuha sa ilang mga ginikanan nga way kalibutan sa naglaroy-laroy nilang mga anak, wa kini magpasabot nga sila gidakop na, gihipos lamang sila. Kun aduna may mabanggaan sa pagpatuman sa Curfew Ordinance kana dili ang Juvenile Law kon dili ang pagkatapulan ni kapitan Jingjing Faelnar ug sa iyang  higalang Mayor.

* * *

Migahin ang kagamhanan sa Nasud og 5 bilyones ka pesos aron motaas ang production sa humay sa mga mag-uuma. Apan ang atong pangutana kun makaabot ba kaha intawon kining maong kantidad ngadto sa mga mag-uuma. Di ba lang kaha mapunta kining maong kantidad ngadto sa mga Kongresista. Kining 5 bilyones ka pesos nga farmers fund di ba kaha kini masusama sa 728 milyones ka pesos nga Fertilizers fund nga ang mga nakapahimulos mao lang ang mga Kongresista nga kaalyado ni Presidente Gloria Macapagal Arroyo ug dili ang mga mag-uuma?