Sayop nga pagtuo sa people power

Daghan ang nag ingon nga dili magmalampuson ang People Power tungod kay wa kini suporta sa militar ug kapulisan. Kung mao, ang People Power dili na tinood nga People Power kun dili Military ug PNP power na kini. Pasayloa ko pero para kanako sayop kining maong pagtuo. Ang People Power gahom kini sa katawhan ug dili gahom sa militar ug kapulisan. Ang sayop nga pagtoo sa People Power makapadako kini sa ulo sa atong mga heneral sa militar ug kapulisan ug magbutang unya kini sa peligro sa civilian authority. Ang paghatag og importansiya sa partisipasyon sa atong militar ug kapulisan sa People Power maghatag lamang kanila og kahigayonan sa paghuna-huna nga sila ang gamhanan ug dili ang katawhan.

Kung atong balikan ug hinoktukan ang una ug ikaduhang People Power, molutaw nga nagmalampuson kini tungod sa bagang duot sa katawhan ug dili tungod sa militar ug kapulisan. Ang militar ug kapulisan niadtong panahona wa nay nahimo tungod sa kabagang duot sa katawhan nga wa na makauyon sa namunoan sa Malakanyang busa mikuyog na lamang kini sa panon sa katawhan. Kay maoy ilang trabaho ang pagpanalipod sa katawhan ug dili ang pagpanalipod sa naglingkod sa Malakanyang, ilang gikuyogan ang katawhan ug gipanalipdan sa pagpapahawa niini sa squater nang presidente.

Ang militar ug kapulisan way gahom ug way mahimo kun ang katawhan na gayod ang molihok. Way mahimo ang mga heneral sa kapulisan ug militar ug ang ilang gingsakpan kun sulongon na sa dakong duot sa katawhan ang Malakanyang. Ang militar ug kapulisan mao ang tigpanalipod sa katawhan ug dili sa naglingkod sa Malakanyang. Busa way armas nga mobuto ug way tangke de gyera nga modagan kun maoy makita niini ang katawhan nga nagluhod ug nagdala og rosaryohan, kandila ug mga pongpong sa rosas paingon sa Malakanyang. Wa usay gamhanan nga naglingkod sa Malakanyang bisan pa sa iyang kasalbahis ang momando sa pagpaposil sa mga tawong nag-ampo ug nangaliyupo nga mokanaug na siya sa iyang katungdanan. Si Marcos ug Estrada pulos napalagpot sa katungdanan nga walay dugong mibanaw busa posibling mao usab kini ang mahitabo ni Pangulong Arroyo. Sa akong pagtoo mahadlok siyang mahilakip sa linya nila ni Adolf Hitler, Pol Pot ug pangulo sa China ug uban pa nga giilang mga salbahis sa kasaysayan sa kalibutan.

Ang People Power mahimo ug magmalampuson may suporta man o wala sa kapulisan ug militar kana kun ang bagang doot sa katawhan magkahiusa na sa pagpalagpot sa atong pangulo nga si Gloria Macapagal Arroyo. Ang gidaghanon sa mga nagprotesta kaniadtong miaging Biyernes usa ka dakong kamatuoran nga dili pa daghan ang wa makauyon sa pagdumala sa pangulo sa iyang katawhan.