Angay gyud silotan

Nalipay ko pagkasayod nga aduna nay gipalabang nga ordinansahon ang konseho sa dakbayan sa Sugbu nga naglatid nga multahan na ang mga tindahan o department stores sa siyudad nga dili mohatag og saktong sukli ug imbes kuwarta ang isukli kendi na hinuon maoy ihatag ngadto sa kustomer isip sukli.

Salamat kung Konsehal Arsenio Pacaña nga maoy nakahunahuna niini. Para god nako, angay gyud silotan ang mga tindahan nga nag-practice og shortchanging. Ang shortchanging gi-discourage sa DTI kay dili kini legal tender isip sukli. Gawas pa, dili gyud kini angay isipong sukli kay dili man kini kuwarta.

Makadaghan na makadawat og reklamo kining ubos tang lindog mahitungod sa mga tindahan nga nag-practice og shortchanging. May mga gasolinahan, botika ug department stores dinhi sa dakbayan sa Sugbu nga naghimog ingon niini. Dili kini makiangayon ngadto sa kustomer labina kun ang maong kustomer dili interesado sa kendi.

Ang kendi usa ka produkto nga baligyaon. Ang angay hatagan niini mao lang kadtong mga kustomer nga gustong mopalit niini. Mahulog sa walay pulos ang kendi kun kini ihatag isip sukli ngadto sa tawo nga walay interes niini. Mausik lang kini kay dili man mapahimuslan sa gihatagan niini.

Manghinaot ko nga mapalabang gayod isip ordinansa ang gihikay nga ordinansahon ni Konsehal Pacaña aron mapitol ang badlongong mga tindahan.

* * *

Nakadawat kog text gikan sa naggamit sa cellphone number 0921-3561783 (Sent:06:44:29pm-- February 8, 2008). Sumala sa iyang text, adunay magtutudlo sa usa ka memorial high school nga kusog kaayong mangayo og kuwarta nga ibayad (kuno) sa pagpa-xerox/. Pero usahay dili kuno ihatag ang xerox sa mga estudyante.

Sumala sa atong texter, babaye kining maong magtutudlo. Nganong mangayo man siya’g bayad sa xerox nga dili man niya ihatag ang kopya sa xerox ngadto sa mga estudyante nga iyang gikolektahan? Nagpa-xerox gyud kaha siya? Just asking!

* * *

(Sumbong ug reklamo? Text sa 0910-8105522)