Suroy-suroy ni PGMA

Matud pa ni Atty. Tony Oposa, usa ka inilang abogado sa tibuok kalibutan sa natad sa Environmental Law, kun aduna kunoy butang nga gusto nimong ipadayag, dangop sa usa ka lalaki, apan kun duna kay butang nga gustong ipabuhat, dangop sa usa ka babaye.

Tingali sa tanang mga senador ug nasyonal nga opisyal sa Pilipinas, bugtong si Presidente Gloria Macapagal Arroyo lamang ang nakatunob sa halos tanang lungsod dinhi sa Sugbu, hasta kadtong atua sa kinalayoan nga mga lugar. Tingali siya usab ang mas daghang lugar dinhi sa Pilipinas nga naduaw.

Dili sama niining ubang mga nanag-ambisyon karon sa pagka presidente nga motambong lamang kun daghan ang magtapok-tapok, si PGMA moduaw gyud sa mga lagyong lungsod bisan kun walay advance party ug walay daghang kuti-kuti.

Nahinumdum ako kausa nga giimbitar kami ni kanhi Bise-Mayor Manreza Lim sa ilang pista sa Medellin. Sa among pagpa-ingon didto, nagkasabot ang grupo nga mohapit siya sa Tabogon tungod kay gusto niyang mabisita ang maong lugar aron iyang makita kun unsay iyang matabang . Naabtan kami sa tingpaniudto didto, ug tungod kay walay miabi-abi kay wala man siya magpahibalo sa iyang pagduaw, nagmantinil intawon mi og kaon og barbecue sa daplin sa dalan. Pwerte niyang lingawa sa among kalaki. Kami intawon daw naglaway naghunahuna sa lamian untang paniudto nga giandam ni Bise-Mayor Lim.

Sa usa ka pagduaw namo sa lungsod sa Sta. Fe ug Bantayan, hilabihan gyud niyang panglamano sa mga tindera og bulad sa merkado sa Sta. Fe, ug mihatag siyag kantidad sa kooperatiba sa mga tindera og isda sa Bantayan . Udtong tutok kadto ug pwerte namong painit sa merkado, ug tungod kay isla lagi ang Bantayan, hunahunaag unsa kainit kadtong panahona. Maayo na lang gani kay sa dayon namong pauli, gihatagan kamig mga T-shirt sa tag-iya sa Sta. Fe Beach Club nga si Susan Holaysan. Kay pag-abot namo dinhi sa dakbayan sa Sugbu, siya diay ang pinasidunggang dinapit sa mga dagkong negosyante atol sa pagtapos sa Business Week nga gipahigayon sa Cebu Plaza Hotel. Ug kay nagkadusingot na man mi, nag-ilis intawon mi sa T-shirt nga hinatag sa Sta. Fe Beach Club, samtang ang mga negosyante nanag-sul-ob sa ilang mga mahalong barong ug imported nga mga amerkana.

Niadto usab nga nagkuyog mi kay nangorona siya sa Sanayon sa Santander, nanghulam lang intawon mi sa sakyanan sa akong igsoon. Nahuman ang koronasyon sa alas dos sa kadlawon, ug tungod kay nianang pagkabuntag aduna man siya'y pamahaw uban kang Cardinal Sin, diha lang intawon mi nangatulog sa sakyanan mentras naghulat sa oras sa iyang paglarga sa eroplano.

Pag-adto namo sa Badian, naatol kadto nga adlaw'ng Domingo. Busa kay nagtupad man ang simbahan ug munisipyo sa Badian, amo pa gyung hisugatan ang iyang mga sulugoon nga diay mga taga Badian nga gikang nanimba. Pwerte nilang hangop kay sa kalayo sa ilang gipang-gikanan, nag-abot pa gyud silas Badian.

Ang akong dili malimtan pag-adto namo sa Barili, mao kadtong didto mi sa merkado uban  kang kanhi Mayor Badang Pace. Nanghulam intawon og megaphone si Mayor Pace gikan niadtong naninda og tambal binisaya aron madunggan si Presidente Arroyo nga pwerte kaayong diskursog binisaya. Sa akong kaikog sa naninda og tambal nga wala na makasing-al aron pagbaligya sa iyang tambal, ako  nalang kining gipalitan og usa  ka botelya haplas.

Kanang simbahan sa Pitalo, San Fernando amo nang pagahapiton kun moari siya dihang dapita sa Sugbu, kay kini mao man ang iyang deboto. Kasagaran, dili na siya magpa-ila kun mosulod siya sa maong simbahan.

Ubay-ubay akog nasaksihan sa kakugihan sa atong Presidente ug nakaagi sad mi nga walay kaon-kaon, walay tulog-tulog, walay ilis usahay, ug gani aduna say mga kulba-hinam, sama niadtong nagsakay mi'g helicopter nga kagang-kagang. Bisan sa mga pagsaway niadtong nangambisyong mopapahawa kaniya, dili gihapon nato ikalimod nga siya ra ang presidente nga kugihang mobisita sa labing daghang lugar sa Pilipinas, bisan sa walay daghang paukyab.

Alang sa inyong mga panahom, palihug email sa [email protected]. Daghang salamat.