2027 pa mahukman
Nipasalig ang kampo ni Bise Presidente Sara Duterte nga maningkamot sa paghuman sa pagpresentar sa tanan nilang mga saksi karong semanaha. Walo ang gitakda nilang ipatawag para sa husay karong Huwebes ug Biyernes, Nobyembre 19 ug 20.
Kon magpadayon ang nasugdan nga pagpasibog sa mayoriya sa ilang mga saksi (18 sa 24 nga ilang gipa-supina sa Senate Impeachment Court sa niaging semana), mahimong matuman ang ilang pasalig nga mopahuway na ang depensa sa dili pa magsugod ang makuti nga deliberasyon sa Senado sa 2027 budget unya sa Lunes, Nobyembre 23.
* * *
Kon matuman ang kalendaryo sa impeachment trial nga gipagawas ni Presiding Officer Chiz Escudero:
•Hatagan si VP Sara og 10 ka adlaw sa pagsumiter sa ilang formal offer of evidence o lista sa ilang mga ebidensiya (sa ato pa, posible nga hangtod sa Disyembre 2);
•Hatagan ang House panel of prosecutors og 10 ka adlaw sa pagkomentaryo sa offer (posible nga hangtod sa Disyembre 12);
•Magkinahanglan ang korte og 3 ngadto sa 5 ka adlaw sa paghukom dawaton ba ang mga ebidensiya sa depensa (posible nga hangtod Disyembre 17);
* * *
•Hatagan ang prosekusyon ug depensa og 20 ngadto sa 25 ka adlaw sa pag-andam sa ilang closing statements o pagpasabot sa kinakusgan nilang mga argumento ug mga ebidensiya ug pagpintal sa kinatibuk-an nga hulagway sa ilang kaso (kon matilok ang tanang nahauna nga lugway, posible nga maabtan sa Enero); ug dayon
•Mopakanaog ang senator-judges sa ilang desisyon (sa ato pa, sa bag-ong tuig na mahibaw-an magpabilin o mapalagpot na sa puwesto si VP Sara).
* * *
Kon tinuod ang pasangil ni VP Sara nga nag-fishing expedition and prosecution, dili ordinaryong mga isda kon dili higanteng mga balyena ang nadakpan sa pagkabisto sa nagkasungi niyang bank accounts, Income Tax Returns, Statements of Assets, Liabilities and Net worth, ug corporate records.
Sa pikas nga bahin, wala pa igkita sa publiko ang iyang gipasidaan nga bloodbath sa pagtubag na sa mga pasangil. Niabot na ang iyang gipangayo nga tukmang lugar ug panahon. Pero ang mayoriya sa pasiuna nga mga saksi ug mga ebidensiya nga napresentar sa depensa nakapasamot hinuon sa pagduot, imbes makatabang, sa iyang kawsa.
- Latest
