Kapitolyo dawat lang og limpyo?

Sa dihang ginganlan ni Bise Mayor Mike Rama ang Kapitolyo nga dawat lang og limpyo puwerting sukoa niini ug gani gibaliwala lang sa  Kapitolyo ang luhod-luhod sa bise mayor. Pero bisan giunsa sa pagtakoban milutaw ra gayod ang tinooray nga batasan sa Kapitolyo ang iyang pagkamapahimudsanon ug ang pagkamaayo niining modawat og limpyo.

Human manghambog ang Kapitolyo nga world class ang Cebu International Convention Center nga gitukod, human manghambog ang Kapitolyo nga dali ug paspas ang pagkatukod niini, nagdumili na ang Kapitolyo sa pagbayad sa kapin 261 milyones ka pesos nga nagasto sa WT sa paghimo sa dugang trabahoon sa nahisgutang edipisyo kay matud pa wa daw kuno kontrata ang nahisgutang trabaho. He build at his own risk, matud pa sa Kapitolyo. Pero dili pod kuno puwede nga kuhaon sa WT ang ilang gihimong improvements sa CICC. Dili ba dawat lang og limpiyo niini ang Kapitolyo? Dili ba mapahimudsanon niini ang Kapitolyo? Dili ba abusado niini ang mga opisyal sa Kapitolyo nga nagsiging-siging sa WT sa pagpahuman pagdali sa CICC tungod kay hapit na moabot ang 12th Asean Summit unya kun paninglan na sa bayranan ingnon lang nga dili bayran kay walay kontrata ang ilang gitrabaho? BAGAG NAWONG SA?

Hinuon wa koy pagtuo nga dili mobayad ang Kapitolyo ngadto sa paborito niining kontraktor sa CICC, ang akong gituhoan mao nga gituyo sa Kapitolyo ang paglangay-langay sa pagbayad ngadto sa WT aron modangop ang nahisgutang kontraktor sa hukmanan aron kun modesider ang hukmanan sa pagpabayad ngadto sa WT makarason na ang Kapitolyo sa pagbayad sa makalipong nga bayranan niini.

* * *

Ang pagpaningil sa WT sa kantidad nga kapin sa 261 milyones ka pesos, pagpamatood lamang kini sa pagkabakakon sa Kapitolyo kinsa nanghambog nga kapin sa 500 milyones ka pesos lamang ang nagasto sa pagpatukod sa Cebu International Convention Center ug ang kamahal sa pagtukod niining maong edipisyo mao seguro ang hinungdan nga gilipat-lipat lang sa Kapitolyo ang Sugbuanon sa tinooray nga kwentada sa nagasto sa pagtukod sa CICC.