EDITORYAL – Makauuwaw nga ‘eyesore’

Usa ka magbabasa nga buot lang mailhan nga “concerned citizen” ang mitawag sa Banat News aron sa pagpadayag sa iyang kahisagmuyo labot sa iyang ginganlag “the city’s most shameful eyesore” kun labing makauuwaw nga talan-awon sa atong dakbayan.

Ang buot niya ipasabot mao kining mga alambre sa kuryente ug telepono nga nagkutay “murag lukot” sa mga poste sa downtown area.

Gitawag kini sa uban nga “spaghetti wires” ug kining maong nagkayamukat nga mga alambre nakapangil-ad sa hitsura sa pipila ka mga maanindot nga edipisyo ug sa dapit mismo diin kini nahimutang.

Nangutana ang “concerned citizen” kun wala na ba gyuy mahimo ang City Hall niini. Ug kun dili ba mapugos ang mga kompaniya nga namutang niining maong mga alambre sa pagpahapsay sa ilang mga linya aron dili na kini mamahimong “eyesore.”

Makapila na hisguti kining butanga sa Banat News apan walay aksyon nga nahimo gawas sa pasalig nga himuon ang angay’ng himuon.