EDITORYAL - Usa ka pagpamukaw

Ang nahitabong pagbuto sa bomba didto sa usa ka dakong mall sa Makati diin walo ang namatay ug ubay-ubay ang naangol angay’ng ilhon nga usa ka pagpamukaw kanatong tanan ilabi na sa mga tigbantay sa kalinaw dinhi sa ato sa Sugbu.

Usa kini ka pagpahinumdom nga kinahanglan hugtan sa kanunay ang pagkamabinantayon batok sa mga elemento nga buot mobungkag sa kahusay ug kalinaw sa atong dapit.

Hagit kini ngadto sa otoridad ug mismo kanatong mga lungsoranon nga maghiusa sa pagbantay nga dili kasudlan ang atong malinawon nga dapit niadtong mga elemento kang kansang tumong ug tinguha mao lamang ang paghimog kagubot.

Kinahanglan usab ang pagsabot sa publiko ug ang pagsangon niini sa mga kalihukan nga ipahigayon sa otoridad alang sa pagkab-ot og kahusay  ug kalinaw sa atong palibot.