EDITORYAL – Kampanya batok frats ug gangs

Suma pa sa balita gihingusgan karon sa kapolisan ang kampanya batok sa mga badlongon sa katilingban, ilabi na kadtong mga sakop sa mga notoryus nga fraternity ug gang.

Mga 90 porsiyento sa pwersa sa kapolisan sa siyudad anaa na sa kadalanan human sa nagsunod-sunod nga mga dugoong panghitabo diin nalambigit ang mga pundok sa mga badlongong batan-on.

Manghinaut kita nga kining labing ulahing aksiyon sa kapolisan batok sa krimen sa kadalanan magpadayon unta ug dili usa lang ka “here today gone tomorrow” nga kalihukan.

Panahon na nga tinud-on sa kapolisan ang kampanya batok sa mga notoryus nga fraternity ug gang aron sa pagpaila niining mga “dregs of society” kun mga hugaw sa katilingban nga mas hawod ang polis kay kanila.

Suportahan sab unta sa publiko kining kampanya sa atong mga polis.