Bag-ong sistema kinahanglan

Tungod sa grabe’ng problema sa trapiko nga nasinate sa dakbayan sa Sugbu  karon, mitumaw na usab ang mga panawagan alang sa usa ka mass transit system aron pagsulbad sa kahuot sa kadalanan sa dakbayan.

Daghan ang miingon nga aron pagsulbad sa maong suliran, mas maayo nga mga depasaherong bus ang ihulip sa mga public utility jeepney aron kuno maibanan ang mga sakyanan sa kadalanan.

Hinuon maayo kana nga ideya tungod kay usa kana sa paagi pag-modernize sa sektor sa transportasyon dili lamang sa dakbayan sa Sugbu kundili lakip na sa Metro Cebu. Apan dili kana maoy sulbad sa problema sa trapiko nga naghatag og labad sa ulo sa mga Sugbuanon karon.

Kun atong butangan ang kadalanan sa dakbayan sa Sugbu og mga depasaherong bus, dili kana garantiya nga maibsan ang problema sa trapiko. Kini tungod kay hagip-ot kaayo ang mga dalan sa dakbayan nga mosamot hinuon kahuot kun butangan og mga dagkong sakyanan sama sa depasaherong bus.

Bisan pa kun pagamyan ang gidaghanon sa mga PUJ nga nagdagan sa dakbayan, dili gihapon kana paigo pagsulbad sa problema sa trapiko tungod usab lagi sa nagkadaghang pribadong sakyanan sa kadalanan dinhi.

Sa akong nakita duha lamang ka pamaagi ang angay sagopon sa kagamhanang lokal sa dakbayan sa Sugbu pagsulbad niining maong problema. Ug kini mao ang pagpalapad sa kadalanan ug pagbutang og light rail transit system dili lamang sa dakbayan Sugbu kundili sa ubang siyudad sa Metro Cebu.

Ang pagpalapad sa kadalanan sa dakbayan sa Sugbu angay unta nga maoy unahon sa lokal nga pangagamhanan gumikan niining nagkadakong problema sa trapiko. Kining maong mga dalan dili na gayud makasagubang sa grabe’ng modernisasyon nga nasinati karon sa dakbayan.

Hinuon, sa una ra unta angay nga padak-an kining maong kadalanan sa siyudad. Apan tungod lagi sa kakulang sa panglantaw sa mga lokal natong opisyal hinungdan nga miresulta niining kasamtangang problema sa trapiko.

Karon, gumikan sa ka gagmay sa mga dalan sa dakbayan, dili kini angay nga butangan pa og mga de pasaherong bus tungod kay mosamot lamang ang panaghuot sa mga sakyanan. Dili usab angay nga limitahan ang pagpadagan sa mga pribadong sakyanan tungod kay katungod sa mga lumulupyo ang pag-angkon og komportable’ng biyahe nga layo sa kahasol sulod sa de pasaherong sakyanan.

Ang mas angay ug haum dinhi sa dakbayan sa Sugbu o sa kinatibuk-ang Metro Cebu mao ang sistema sa light rail transit. Kini tungod kay ang maong sistema dili makabalda sa dagan sa mga sakyanan sa kadalanan ug mas makahatag pa sa katawhan og dinalian ug hamugaway  nga biyahe.

Apan dili malikayan nga matibhangan gayud ang gidaghanon sa mga PUJ sa kadalanan kun matuman na gayud ang pagpadagan sa mga tren dinhi. Kay sa katapusan dili nato mapugngan ang gusto sa katawhan nga makabaton og modernong sistema sa transportasyon.

Samtang sayo pa, angay na gayud nga ipatuman sa lokal nga kagamhan ang bag-ong sistema sa transportasyon sa Metro Cebu. Gikinahanglan na kaayo kini tungod sa grabe’ng problema sa trapiko nga atong nasinati nunot usab sa grabe nga kalamboan nga misakdap sa Sugbu karon.

Ug gawas sa pag-modernize sa mga hagip-ot natong kadalanan, kini lamang sistema paggamit sa tren ang bugtong paagi pagsulbad sa nagkamaot ‘tang dagan sa trapiko. Dili gayud moasenso ang sitwasyon sa trapiko kun walay ipatuman nga konkretong kausaban sa sistema sa pampublikong transportasyon.

* * *

Ipadala inyong reaksiyon sa [email protected]