EDITORYAL — Wa nay tabanog sud sa siyudad

Sud sa pila na ka henerasyon ang pagpalupad og tabanog maoy usa sa mga kalingawan sa atong kabataan. Nahimo na gani kini nga kabahin sa ilang kinabuhi ilabi na panahon sa summer ug atol sa bakasyon nila sa eskuwelahan.

Karon ang kabataan dinhi sa dakbayan sa Sugbu dili na tugtan sa pagpalupad og tabanog. Gidid-an sila sa usa ka ordinansa diin giisip nga usa ka "krimen" ang pagpalupad og tabanog sud sa boundaries kun mga utlanan sa dakbayan.

Kini tungod sa kadelikado kuno niini ngadtos mga abyon ilabi na sa mga helikopter nga naglupad usab sa kalangitan.

Ang kadelikado sa tabanog kuno namatud-an dihang nahagsa ang usa ka helikopter diha sa Lapu-Lapu City tungod kay ang tugot niini nisabod-sabod sa propeller sa maong abyon.

Busa wa na tay makita nga mga tabanog nga maglupad-lupad sud sa atong siyudad hangtud nga ang mga tighimo sa helikopter makapalig-on sa ilang produkto diin hilupigan na niini ang pobreng tabanog.