Tabanog vs chopper

Hinaut nga di ni tinuod, kay kun tinuod, daku kining pakauwaw sa United States of America, nga kun wa ko masayop, usa kini sa mga second hand nga mga helicopter nga ilang gi-donate nganhi sa pobre natong nasud, ug giingon nga most corrupt country in Asia.

Poor country, sa ato pa, way kwarta, apan daghan kaayong kwarta kun corruption nay hisgutan. Way kwarta ang mga tawo, apan, mobaha ang kwarta, panahon sa eleksiyon.

Poor country, apan luho kaayo ang mga sakyanan ug mga mansion ang mga pinuy-anan sa mga public servants kun mga ulipon sa lungsod, samtang kitang ilang mga master ug mga agalon sa lungsod, nag-ilaid sa kalisud.

Anyway, giingon man nga beggars cannot be choosers, sa ato pa, kun usa ikaw ka makililimos, dili ka makapili kun unsay imong gusto, busa, dawata bisag unsay ihatag nimo, bisag unsay ilimos nganha kanimo.

Mao kini ang nahibato sa mga segunda mano nga mga helicopter, nga inay ilang ilabay, ilang gilimos nganhi sa atong nasud. Ug hilabihan natong lipaya. Ug mao na kadto ang tipik sa modernization program sa armadong kusog sa atong nasud.

Manghinaut kita nga dili kamatud-an nga tabanog maoy nakapahagsa sa helicopter. Kay kun matinuod man, daku kining problema sa seguridad sa atong nasud, kay tiaw moy tabanog ra diay ang ipalupad sa atong mga kontra kun makiggubat sila nato.

Ubang mga radio commentator, ilang gipakapinan pag-ingon nga kun makahagsa sa helicopter ang tabanog, labaw pa ang tirador. Sa ato pa, kun mag-gira man, tirador ug tabanog lang unya ang atong mga kontra.

Bitaw, it’s time, hataghan nag serious nga panghunahuna ug aksiyonan na ang modernization program sa atong kasundalohan. Kun ang atong gigasto sa mga way kapuslanan nga décor lampposts, sa convention center ug ubang mga dagkung gasto sa miaging summit, ato lang gitampo pagpamalit og modernong kahimanan sa AFP, dili unta ta daugdaugon lang og tabanog.