Hagit sa PNP

Usa ka adlaw human madakpi sa mga sakop sa Philippine Drug Enforcement Agency 7 ang duha ka sakop sa Service Security Group sa Cebu City Police office nga nag escort sa usa ka inilang tigpayohutan og ginadiling drugas, duha na usab ka sakop sa Waterfront Police Station ang nadakpan sa mga sakop sa National Bureau of Investigation atol sa gihimong entrapment operation gumikan sa pagpangilkil ngadto sa usa ka inahan sa dinakpan sa pagpayuhot og ginadiling drugas. Si Police Sr. Supt. Patrocinio Comendador, director sa kapulisan dinhi sa Sugbu mitug-an usab nga aduna pay mga 18-20 ka mga police sa siyudad sa Sugbu ang nalambigit sa ginadiling drugas, hinungdan nga iyang gimandoan ang CIIB sa pagdakop niining maong mga police.

Naunsa na man kining kwerpo sa atong kapulisan nga wa man gayod kini biyai sa mga sakop nga badlungon nga maoy hinungdan sa pagkagusbat sa iyang dagway. Di na gyud kaha mawagtang sa imahin sa atong kapulisan ang mga kauwawan nga gihatag ug gibilin sa iyang mga sakop nga badlungon? Di na gyud kaha mawagtang sa atong kapulisan ang mga sakop niining kuwanggol ug boangon? Porbida! Pagkasayang sa paningkamot sa ubang police nga nagtinarong ug naningkamot sa ilang trabaho aron lang mabalik ang pagsalig sa katawhan ngadto sa atong kapulisan. Unsa gyod kaha ang hinungdan kon nganong wa mawagtang kining mga badlungon sa atong kapulisan? Seguro, ang silot nga dili epektibo maoy hinungdan kon nganong aduna pay mga police nga makaako sa pagpabadlong sa ilang katungdanan. Ang pagbutang ubos sa floating status ug ang pagbalhin lamang ngadto sa laing lugar sa mga police nga nakahimo og kalapasan sa ilang katungdanan dili usa ka epektibo nga sulbad sa mga police nga nagpabadlong.

Seguro, aduna usay problema sa selection process sa pagdawat og mga aplikante sa pagkapolice, kay nganong nakasulod man kining mga police nga psychologically defective. Tarong ba ugod nang police nga magpamasahe sa iyang kinatawo sa pinirisong babaye kay kuno gipanuhot kini! Tarong ba ugod nang police nga mag-brief sulod sa iyang opisina, mamaak og dughan sa tawong giimbistigahan ug mosulod sa motel kay nag LBM kuno ang kanahan?

Mas maayo seguro nga tan-awon ang selection process sa mga aplikante sa pagka-police kay duda ko nga mao kini ang hinungdan kon nganong nakasulod ang mga police nga psychologically defective tungod ba kaha kay gibayaran ug adunay palakasan sa pagpanawat og mga bag-ong police. Natan-aw na ba ni ninyo? Hinaot pa unta!