Balabag ni Comendador

Dakong balabag karon sa liderato ni Sr. Supt. Patrocinio Comendador ang pagpabadlong sa iyang mga sakop sa San Nicolas Police Station niadtong Huwebes Santo sa kaadlawon.

Tiaw mo, usa ka sarhento sa Philippine Air Force gibastrok sa usa ka opisyal sa polis, ang deputy chief sa San Nicolas Police Station!

Kun nahinumdum kamo, dihay pinusilay nga nahitabo tali sa usa ka polis ug sundalo, si PO2 Jessie Yramis ug Sgt. Darwin Busico, sa usa ka imnanan duol sa Taboan public market niadtong Huwebes Santo.

Unang namatay si PO2 Yramis tungod sa samad agi sa bala sa pistola ni Sgt. Busico. Apan, nasamdan si Sgt. Busico nga giguroy ni Inspector Patrocinio Abesia, ang deputy chief sa San Nicolas.

Daghan ang nakakita nga giduslak sa puan sa iyang .357 nga rebolber ang gusok ni Sgt. Busico bisan nagkadugo na kini tungod sa samad agi sa bala gikan sa pusil ni PO2 Yramis.

Sa wala pa bastroka ni Inspector Abesia ang sundalo, gikarga na unta sa duha ka silingan si Sgt. Busico nga sila si Renato Paon ug Arnel Jurado sa sakyanan sa VECO aron dad-on sa ospital, apan miabot ang lain pulis nga si PO2 Jasper Nuñez ug gipangtionan ug giingnan silang Paon ug Jurado nga "ayaw’g panghilabot."

Wala madali og dala sa tambalanan si Sgt. Busico. Ang nakapait, gidala pa gyud kini sa Taboan police station, ug didto gidukdok ang kamot niini hinungdan sa pagkaguba niini.

Grabe gyud ning mga polisa pagkawalay disiplina! Samaran na, kulatahon pa!

Kun kinsa man ang sad-an nilang PO2 Yramis ug Sgt. Busico, ang Ginoo ray nasayod. May mga saksi nga makaluwat og affidavit. Apan wala na usab mahasubay sa patakaran sa pamolis ang pagkulata og tawo nga samaran na, bisan si Pres. Arroyo pa ang gipusil niini, kinahanglan atimanon una kini pagsalbar sa iyang kinabuhi, ug unya na ang pagpatubag kun may salaod man kining nahimo.

Kun akoy Sr. Supt. Comendador, dili na ko mopaabot nga modangop ang kabanay ni Sgt. Busico ngadto sa laing mga ahensiya sa kagamhanan aron sa pagpasusi sa hitabo. Maayong relibohan nalang niya ang mga sakop sa Taboan police station nga nalambigit sa pagkulata sa samaran nga sundalo.

Kun akoy kabanay ni Sgt. Busico, dili ko magsalig sa imbestigasyon sa kapolisan kay nakaseguro ko nga lawgawon ra pud na. Kinsay magnilabanay? Gikulata pa man gani si Sgt. Busico bisan samaran na, unsa na kaha ang imbestigasyon?

Akong tambag sa kabanay’ng Busico ang pagdangop sa National Bureau of Investigation – 7 o sa Criminal Investigation and Detection Group – 7 aron sa pagpa-imbestigar sa hitabo.

* * *

BALIBAD. Milutaw na ang tinuod nga pagkatawo ni Jonathan Guardo.

Wala pa gani siya mapili, migawas na ang kolor sa pagka-trapo (traditional politician) nga mosaad unya dili tumanon.

Mga 25 ka atleta ang gisaaran ni Guardo nga suportahan sa ilang duwa sa Arafura Games sa Darwin, Australia.

Pero, karong bag-o, mibalibad na si Guardo!

Tan-awa, trapo-style man nang magsaad-saad nga dili tumanon, matud pa sa akong amigong konsehal sa barangay.

Alang kanako, wala gyud tinuoy hinungdan nang magsaadsaad nga dili tumanon.

Kay nakasaad man si Guardo, siyempre may kuwarta gyud siyang igong ikasuporta sa 25 ka atleta.

Apan kun tinuod man nang estorya nga nanggawas nga namayad siya sa mga opisyal sa upat ka barangay sa south district aron iseguro ang iyang kadaogan, nahurot na tingale nang iyang kuwarta.

Mao bitaw nang gipasakaan na siya og kasong kriminal tungod kay mitalbog ang tseke nga iyang giisyu alang sa iyang utang sa LBC.

May kuwarta pa o wala na, maayong usbon nato ang atong awhag sa pagsusi sa pasangil nga may binayranay sa mga opisyal sa south district.

* * *

PAMAYAD. Nganong mamayad man kun buot magpapili?

Kanang mamayad timailhan kana nga wala gyuy ayo ug walay silbe ang usa ka politiko. Kay ang pagpamayad sa mga botante usa ka buhat sa desperado nga walay tsansang pilion tungod sa dagway niini sa katilingban.

Maayong ibilin na lang sa mga botante ang pagbuot kinsay ilang pilion ini’g abot sa eleksiyon.

Pila na ka eleksiyon ang nahitabo sa Pilipinas, sukad ko nakamatngon og buot, ang estorya sa binayranay madungog gayod.

Bisan ang mga sakop sa akong pamilya mag-iniphanay pila ang ilang madawat gikan sa usa ka politiko ini’g eleksiyon. Apan dili malikayan nga may manghilak kay gitabla sa ilang lider kay ang alang kanila gi-um-om.

Ang akong punto mao, kun dili kalikayan ang pagbaha sa kuwarta, maayong likayan nga magapos sa kuwarta ang atong konsensiya.