Remembering the Osmeña-Cuenco Fusion

Sa akong nahinumduman, di pa ko ka-botar niadtong panahona, grabe kaayo ang politikanhong panag-atbang sa mga Osmeña ug Cuenco dinhi sa Sugbu. Sakop pa kanhi ang dakbayan sa Sugbu sa lalawigan (maka-botar pa ang mga city residents pagka-gobernador), Nakaabot pa man sad gani ko sa grabeng kompetensiya sa Bisaya transportation sa mga Cuenco ug sa Autobus sa mga Osmeña.

Usa sa dakung isyo sa 1950s, paglansar ni Serging pagka-Gobernador sa Sugbu, mao ang "dos-por-dos" nga binunalay sa eleksiyon sa 1949. Midaug si Serging gumikan sa maong isyo, diin giisip siya sa mga Sugbuanon nga Messiah, manluluwas sa demokrasya ning dapita sa kalibutan.

Senador pa niadtong panahona si Don Mariano Jesus Cuenco, diin ang iyang pagka-Chairman sa Blue Ribbon Committee, naka-earned kaniyag dakung kadungganan sa tibuok nasud. Hinoon, mga dungganan ug mga banggiitan man ang mga Senador sa among panahon.

Ug taliwaa sa panag-atbang ning duha ka dagkung bansagon sa Sugbu, nahitabo ang wa damha nga mahitabo: ang panagsabot ug panaghiusa sa duruha ka ngalan, ang Cuenco-Osmeña Fusion. Lipay kaayo ang mga Sugbuanon sa maong hitabo.

The rest is history.

Ang nahitabo karon tali kanila ni Sonny ug Tomas, nakapahinumdom kanato sa Cuenco-Osmeña Fusion, nga kon kadto nahimo sa duha ka nagkaatbang ug nagkalainlain nga banay, nganong di man mahimo karon ang Sonny-Tomas fusion nga pulos man unta sila mga Osmeña?

Mas grabe pa ba ang ila karong panagsungi kay sa mga Cuenco ug Osmeña kanhi? Di na ba gyud sila ma-reconciled? Unsa may ilang gikasungian? Kon nagkauban karon sila si Sotto ug Oreta sa senatorial lineup ni Gloria, nganong di man magkasabot sila si Sonny ug Tomas?

Kon si Sotto nga usa ka dakung haligi ni FPJ, ug si Oreta nga hilabihang sayaw sa dihang wa buksi ang Velarde envelope, kon sila karon mga kandidato na ni Gloria, nganong di man magkauliay sa maayong kabubut-on ang mag-agaw nga Sonny ug Tomas?

Sila ray makatubag ini, Dro. Kutob lang ta sa pagpangutana. Perhaps, maka-mediate sila si Serge ug Lito. .