Kontest sa tak-om

Mahimong mag-abot na sab sa ikaduhang higayon pagka mayor sa Consolacion silang Mayor Avelino Gungob ug kanhi bise mayor Teresa Alegado. Kini kon makumbinser si Alegado pagtahan sa iyang pagpangu sa kampanya sa party list sa Grains Retailers Confederation (Grecon) nga siyay nasudnong presidente ug nag-unang nominee alang sa Kongreso. Matod ni Alegado determinado na unta siyang mag-kongresista apan di sab siyang kabalibad sa iyang kaubanan sa oposisyon sa Consolacion kon nagkinahanglan pa sila sa iyang liderato.

Si Gungob sa iyang bahin nakahingpit na sa iyang slate. Nga niya pa di na mausab bisan managsama na sila karon ni Bise Mayor Leo Go nga mga sakop sa partidong Kampi ni Pres. Arroyo. Matod ni Gungob di na mahimong pulihan ni Go ang iyang runningmate nga si Konsehal Ember Alinsug. Silang Gungob ug Alegado kuyog sa ilang kaubanang mga kandidato maoy mga dinapit sa Kapamilya Media Forum sa DYAB Abante Bisaya, Sky Cable ug SM City.

* * *

Sunod semana, duha na ka buwan human sa ASEAN Summit, apan hangtod karon wa pa gyod makahatag og kuwentada silang Gobernador Gwen Garcia, Mandaue City Mayor Teddy Ouano ug Lapu-Lapu City Mayor Arturo Radaza sa dagko nilang gasto ginamit ang minilyon ka pesos nga kuwarta sa Sugbuanong mga magbubuhis, pundo sa nasudnong kagamhanan ug inutang sa mga bangko. Bugtong si Cebu City Mayor Tomas Osmeña ra gyoy nakahatag og detalyadong liquidation sa iyang gasto sa pangandam sa summit niadtong Enero.

Hangtod karon, si Mayor Osmeña ra say lokal nga opisyal nga nagsaba-saba batok sa nisibaw nga mga pagduda sa minilyon ka pesos nga overpricing ug ubang anomaliya sa mga proyekto sa summit. Nga nakapasamot sa mga pagduda sa talagsaong pagpakahilom nilang Garcia, Ouano ug Radaza. Mao bang wa silay ek mahitungod sa nangalisbong mga transaksiyon sa summit, bisan ila untang tahas ang pagpakabana batok sa pag-usik-usik sa daginuton pundo sa kagamhanan, kay gawas nga hadlok paninglan sila mismo maglisod pagpatin-aw sa mga proyekto nga ilang gipasiugdahan?

* * *

Maong sa makausa pa, mangahas na sab ko pagpaningil nila:

• Gobernador Garcia: Nganong sayon man kaayo alang nimo ang pagpalayas sa kabos nga 5,000 ka mga pamilya apan bukid man kaayo sa imong buot ang paghatag og katin-awan giunsa paggasto ang kuwarta nga di imo pagtukod sa CICC ug ubang mga proyekto sa summit?;

• Mayor Ouano: Nganong naglisod man ka pag-detalye giunsa nimo paggasto ang minilyon ka pesos gikan sa panudlanan sa Mandaue, sa nasudnong kagamhanan ug sa imong mga inutang sa bangko?; ug

• Mayor Radaza: Nganong tak-om pa man ka sa takobo sa pagpasabot sa taga-Opon nganong nakaako ka paggasto sa calamity fund nga alang lang gyod unta sa mga biktima sa katalagman?

* * *

Email: [email protected]