Reklamo sa guwardiya

Niining bahina sa akong lindog, tugoting akong palutson kining reklamo sa usa ka security guard nga gipadangat pinaagi sa text. Mihangyo siya nga dili lang ipatik ang kompleto niyang cellphone number aron dili kaayo siya mabisto.

Ang iyang text nagkanayon: "Good day, Sir. Usa ako ka security guard since year 2002. Nagserbisyo ko tinarong pero wala koy 13th month pay nga nadawat. Ang akong suweldo gikuhaan nila para SSS ug BIR pero pag-verify nako walay remittance. Nasayran sa agency nga nag-verify ko. Ila kong gitangtang pero verbal lang ang pagtangtang nila nako. Midangop ko sa labor. Three times nga wala motunga ang respondent, 7 months na ang nakalabay wala pa gihapon mopagawas og desisyon ang arbiter tungod kay daghan kunong kaso naglut-od sa ilang office. Ingon niana ba gyod kadugay makadesisyon ang labor arbiter?" - 0921-6575xxx

Daghang salamat sa imong text. Ang akong ikasugyot kanimo mao nga magpadala ka og sulat ngadto sa labor arbiter nga maoy naggunit sa gisang-at nimong kaso. Sa imong sulat, hangyoa ang arbiter nga kon mahimo ipakanaog na niya ang desisyon kay dugaydugay na ang imong pagpaabot. Kon wala pa gihapon ing desisyon, o kon walay himuong aksiyon ang arbiter, ireklamo siya ngadto sa Ombudsman. Hinuon, kining maong lakang nagkinahanglan na gyud sa imong pangursonada.

Usahay lisod ang pagpanalipod sa atong katungod kay kitang mga gagmay sayon ra kaayong yatakan sa mga halangdon. Apan magpabilin kitang mosalig sa ngipon sa atong balaod. Idangop gayod nato ngadto sa mga buhatan sa kagamhanan nga maoy may katungod pag-atiman sa atong mga suliran mahitungod sa pamuo aron makahatag sila kanatog giya kon unsay angay buhaton ug maangkon nato ang hustisya ug kaangayan.

Bahin sa imong suweldo nga gikuhaan para sa SSS ug BIR apan wala diay i-remit sa imong employer, dili kay ikaw ray nahiagom sa samang pagkabiktima sa mga employer nga mapahimuslanon. Paabota lang una ang hukom sa labor arbiter. Kon mapagawas na ang desisyon, anha nimo masuta kon unsa ang imong makuha gikan sa imong employer nga mitangtang kanimo sa trabaho tungod lang kay ilang nasayran nga imong gi-verify sa SSS ug BIR ang remittance sa imong suweldo nga ilang gikaltasan.

* * *

(Sumbong ug reklamo? Text sa 0910-8105522)