EDITORYAL — Suportahan ta ang mga magtutudlo

Gikataho nga ang mga magtutudlo sa Central Visayas -- kun daghan niini kanila -- ang wala ganahing moserbisyo panahon sa eleksyon ning umaabot nga Mayo 14.

Ang hinungdan mao ang kadelikado sa ilang trabaho ug kahasol niini kun duna unyay mga politiko nga moprotesta sa resulta sa piniliay.

Bisan tuod nga duna silay honorarium nga tag P1,000 matag usa kanila kada adlaw sud sa tulo ka adlaw dili kini makabayad sa kasamok ug kahasol kun mapasakaan og kaso kalabot sa ilang pagserbisyo sa eleksyon.

Makagasto usab sila sa ilang kaugalingong kuwarta kun sila masugamak og election protest nga moabot sa husgado.

Apan walay mahimo ang mga magtutudlo. Sa gusto nila'g sa dili moserbisyo gayud sila panahon sa piniliay kay gilatid man kini sa balaod. Ug obedience maoy usa ka virtue nga gisagop sa atong mga titser.

Kinahanglan nga kining atong mga magtutudlo nga manerbisyo sa eleksyon hatagan sa kagamhanan og maarang-arang nga benepisyo lakip na ang proteksyon batok sa mga reklamador ug abusadong politiko.

Suportahan ta ang atong mga magtutudlo.