Hulga sa Sinulog

Di kasinahan ang nahimutangan karon sa mga tagduma sa tinuig nga Sinulog mardi gras: Samtang gipasidunggan sila nga nagmalampuson pagpalambo sa kalidad sa mga sayaw, padayon sab silang gihamok sa paspas nga pagtidlom sa gidaghanon sa contingents nga nangapil sa di na malalis nga labing dakong indigay sa sayaw sa tibuok nasud. Ang kaapiki sa sitwasyon naklaro sa pagsugod na nilag bayad sa inilang contingents aron lang magpadayon sa pag-apil.

Makiangayon ang paghigpit sa mga lagda nga nakapakagiw sa way kapuslanang contingents, nga kon di magkamisin ug maghayon lang paglakaw sa ruta, nagpadaylang lang sa mga produkto ug mga personalidad. Apan ang determinadong paningkamot sa mga tigpasiugda paghimong mas mabulukon sa mardi gras nakapalipat nila sa tinuod nilang tahas, nga nisangpot sa pagkapapas sa tinuod nga diwa sa Sinulog.

* * *

Ang pagpasidungog sa mga tigpasiugda sa labing makapaukyab nga contingents nakapatumaw sa higanteng props nga di na mo-arang sa kadalanan. Inay pugson ang contingents pagpahaom sa ilang sayaw ug props sa naandang ruta, gitugotan pa gyod sila pagbukhad sa labing luho nilang kiat sud sa Cebu City Sports Complex.

Nga nisangpot sa kataphaw sa mga ritwal sa mga mananayaw nga makit-an sa kinabag-an nga nag-atang sa kadalanan. Nga nisangpot sa padayong pagburot sa gasto sa matag contingent. Nga nisangpot sa kabugnaw ug kaluya sa kahugpongan ug local government units nga di kaparang sa mas adunahan nilang mga katugbang. Nga nisangpot nga ang kinabag-an sa mga nangapil sa nangaging mga Sinulog wa na igkita sa tinuig nga mardi gras.

Inay tul-iron ang ilang kasaypanan pinaagi sa pagbanhaw sa tinuod nga sayaw sa Sinulog, nga gamay tuod ang gasto apan gikan sa mga kasingkasing nga nagdilaab sa tumang gugma ug debosyon sa milagrusong Patron, ang Sinulog Foundation nag-usik-usik pagpabaha sa minilyon ka pesos nga financial assistance, nga di mahitabong makapalit pagbalik sa naandang kasadya.

* * *

Human sa Asean ug East Asian Summits dinhi sa Sugbo, nisulbong ang atong interes sa mga panghitabo sa atong silingang kanasuran. Sa paglingiw kadiyot gikan sa gubat sa Iraq ug mga eskandalo sa Hollywood, atong nahibaw-an nga ang ilang mga kontrobersiya pila lang ka adlaw human sa summit way kalainan sa mga panghitabo sa atong kaugalingong nataran:

• Sakop sa delegasyon ni Indonesian Pres. Susilo Bambang Yudhoyono gipasanginlan nga nisuway pagpaburot sa ilang bayranan sa hotel dinhi sa Sugbo atol sa summit;

• Ang kagamhanan sa Thailand gawas nga gipasanginlang ni-censor sa cable companies aron di makita ang CNN interview uban ni kanhi primero ministro Thaksin Shinawatra, nisilot sab sa Singapore tungod sa pagtugot sa pagduaw ni Thaksin; ug

• Ang kagamhanan sa China gipasanginlang nagdumili pag-imbestigar sa kamatayon sa usa ka peryodista nga gikulata sa goons sa iyang gibistong ilegal nga minahan amihanang lalawigan sa Shanxi.

* * *

Email: [email protected]