Sumpa sa uwan

Ambot kon kinsay nagsugod ining naandan na nga paghalad og mga itlog ngadto sa mga mongha aron paglikay sa pagbunok sa kusog nga uwan atol sa mahinungdanong mga kalihokan. Kasagaran sa nidangop ini mao ang mga kaslunon o mga magpabunyag nga ang reception himuon sa gawas o mga kahugpongan nga magpasiugda og kalihokan sa mga plaza ug ubang dapit nga bantang ug hukas kaayo sa uwan. Bisan sa pagpasiugda sa DYAB Abante Bisaya sa sa nangaging mga "Halad sa Kapamilya" sa Plaza Independencia sa Dakbayan sa Sugbo, kusganon ming giawhag sa among kaabag nga mga kahugpongan nga maghalad og itlog aron di mag-uwan.

Ang among pagdumili ug ang pagbunok sa kusog nga uwan sa pipila namo ka kalihokan wa kapugong sa pipila pagtulisok sa among ka-irihis. Maayo na lang nga bisan sa kahasol sa uwan wa mabungkag ang kaliboan ka mga Sugbuanon nga nagtapok sa among mga "Halad" nga nahimo nang labing dakong piyesta sa libreng pagpanambal ug sa nagkalainlaing mga pangalagad sa mga ahensiya sa kagamhanan ug pribadong mga kompaniya.

* * *

Maong nadapit ang akong pagtagad sa pahibawo ni Ambassador Marciano Paynor sa National Organizing Committee (NOC) sa 12th Asean Summit nga nagpada si Gobernador Gwen Garcia og duha ka trak nga itlog ngadto sa Carmelite ug Poor Clare monasteries aron nga di mag-uwan sa summit nga magsugod na karong Biyernes. Si Paynor, sama sa kasagaran nato nga mga "irihis," naghupot sa sayop nga pagtuo nga ang mga itlog maoy sumpa sa uwan. Laing dako natong sayop mao ang pagtuo nga ganahan sab kaayong modawat sa mga itlog ang mga madre sa Carmelite ug Poor Clare.

Dakong opisyal sa Simbahang Katoliko nipahinumdom sa tanang hingtungdan nga ang pangaliya di ang mga itlog maoy makabadlong sa uwan ug nga ang pangaliya, labi nang mga itlog, di garantiya nga paminawon sa kahitas-an ang mga pangilaba pag-abog sa uwan.

Ug ako sang nahibaw-an nga ang mga madre sa Carmelite ug Poor Clare dugay rang nahasol sa kadaghan sa mga itlog nga gipabaha ngadto nila.

* * *

Sakto si Gobernador Garcia sa iyang pagtul-id sa kasayuran nga gihatag ni Paynor. Di mga itlog kon dili groceries maoy iyang gipahatod sa mga madre. Kasaligan nakong mga tinubdan nagbutyag nga ang mga madre napugos og pamaligya sa mga itlog sa ubos kaayong presyo kay di man nila mahurot pagkonsumo.

Alang sa mga gusto sang mohalad og mga pangaliya pag-abog sa uwan sa summit, mas kapuslan sa mga madre sa Carmelita ug Poor Clare ang mga sinakong bugas, mga prutas ug ubang mas makapahimsog nga mga pagkaon.

Apan di mabasol ang mga nagduda nga ang bagyong nakapauswag sa summit sa niaging buwan ug ang pag-uwan nga gipasidaan sa Pag-asa karong semanaha maoy silot sa Labawng Makagagahom sa di lunsay nga katuyoan sa mga tigpasiugda.

* * *

Email: [email protected]