Hain ang mga dispatser

Kining maong pangutana makatabang sa paghatag og giya sa mga awtoridad aron matultolan ang dapit nga gilubloban sa daghang mga dispatser nga nakahasol sa daghang mga PUJ driver. Pinaagi niining pangutanaha, magiyahan ang mga tigpatuman sa balaod paingon sa dapit diin anaa ang daghang mga dispatser.

* * *

Sumala sa mga text nga akong nadawat, adunay dispatser diha sa dalan F. Ramos duol sa Cebu Midtown Hotel. Sumala sa nagpadangat kanako ning kasayoran, maoy ipasalir ning maong dispatser sa iyang modus operandi panahon sa kagabhion. Sa panahon nga adlawan, dili kaayo magpasaya-saya kining maong dispatser. Nahadlok tingali nga masigpatan sa mga mananakop.

* * *

Laing reklamo nga akong nadawat mao ang bahin sa dispatser nga anaa diha sa may eskina sa Manalili ug Osmeña Boulevard. Mao gihapon ang estilo sa iyang modus operandi. Sa adlawan dili kaayo magpadayag sa iyang kaugalingon ngadto sa publiko apan kun gabii na gani, anha na siya mopasalir sa iyang tinonto.

Sa may Osmeña Boulevard sab mismo, naay dispatser nga gireklamo sa mga driver sa PUJ nga maggikan sa dapit sa Capitol ug Guadalupe. Naa ang maong dispatser duol sa skywalk atbang sa Robinsons. Naa man ning jeepney stop diha. Mang-harass ra ba gayod (kuno) sa mga driver, kanang maong dispatser nga dako og lawas. Mopasalir pod siya sa iyang tinonto kun gabii na.

* * *

Maayo tingali nga subayon kini sa mga tinugyanan sa balaod. Pinasubay sa City Ordinance 1219 nga nailhan nato nga Anti-Dispatching Ordinance, angayan gayod nga dakpon kanang mga tawhana. Kon walay makabadlong nianang mga tawhana, magpadayon gayod sila sa pagdalit og kahasol ngadto sa mga PUJ drivers.

Uyon ko kun ipatuman ang plano ni Konsehal Raul Alcoseba nga padak-an ang multa sa mga dispatser. Usa kini sa mga paagi nga masanta ang mga dispatser nga ang mga polis ra usab maoy bantayan. Kon sa ilang paniid walay polis, mopasalir sab sila sa ilang tinonto. Ug kon madakpan, dili man sab sila kaayo mabalaka kay gamay ra man ang silot. Busa mas maayo gayod nga padak-an kining silot ug multa sa mga dispatser aron mawad-an silag kadasig sa pagpasalir sa ilang modus.

(Sumbong ug reklamo? Text sa 0910-8105522)