Aksyon lang palihug

Makaiibog kaayong tan-awon ang mga adunahan nga mangompra og subra kadaghan nga mga pagkaon diha sa mga grocery sections sa dagkong department stores ug mga malls atol karong panahona.

Matag kakita nako sa maong mga talan-awon, manumbalik sa akong panumdoman ang pasko niadtong 1983, kadto maoy usa sa labing pait nga pasko alang kanako.

Kining pasko, gisaulog sa tanang mga Kristohanon kay sigun sa Bibliya sumad man kini sa pagkatawo sa atong Ginoo.

Apan kon wala kay kuwarta atol sa pasko, ingon sa dili mabulokon kanimo ang kasaulogan kay samtang malipayon ang uban, namalit og makaon apan ang uban usab wala gani makakaon makatulo sa usa ka adlaw.

Matag sulod nako sa mga grocery section sa mga dagkong tindahan, makita nako ang mga adunahan nga nanagsugwak ang ilang mga pinalit, dunay uban nga namalit nang daan og mga pang-salad.

Unya, inig-abli sa ilang mga pitaka, mapagarbohon kaayo sila nga mopasundayag sa daghang tibuok tag P1,000 ug P500 nga papel de bangko.

Hinuon, ang ilang pagka-adunahan, tingali nahimo ug ilang nakab-ot pinaagi sa pagpaningkamot.

Bisan og unsaon gyud hinuon nimo sa pagpanarbaho, dili ka gayod madatu. Ako maoy kuhai og ehemplo. Senior staff reporter ko sa Freeman, radio reporter ko sa DYLA ug nagsuwat pa gyud ko sa Banat News.

Apan ang suweldo nako sa maong mga trabaho, igo ra gihapon nga mahurot sa paggasto. Hinuon, wala gyud ko magkalisud-lisud nga walay makaon, apan dili makapadatu ang trabaho.

Sagdi lang og dili ta madatu. Akong awhag sa mga higala nako nga likayi gayod ninyo ang pagkatapolan, usba ang inyong mga batasang tapolan sa sunod tuig.

* * *

Pinaagi ning akong lindog, awhagon nako ang mga opisyal sa among barangay Lorega-San Miguel nga hapsayon unta nila ang atubangang bahin sa barangay hall gikan sa mga pinasagad nga parking sa mga sakyanan.

Nganong dili man gayod kamo makabadlong sa mga tag-iya og sakyanan nga magpasagad og parking diha sa karsada. Usahay, mag-atbang ang mga sakyanan nga mo-parking.

Unsa, wala ninyo makita ang problema sa kahuot sa trapiko diha tungod sa mga illegal parking?

Awhagon nako si Kapitan Fortunato Parawan ug ang hepe sa barangay tanod nga si higalang Toto Maloloy-on nga modistino gyud og mga tanod atul sa "peak hours" sa buntag ug sayong gabii, aron mopahapsay sa trapiko.

Kon dili ninyo kini mahimo, tukma tingali nga mahulagway kamo nga mga huyang nga opisyal.

Awhagon usab nako ang mga sakop sa konseho sa barangay, ilabi na si Konsehal Julie Yosores, nga isugyot gayod niya ang estrikto nga pagpatuman sa "no parking" sa mga gagmay'ng karsada.

Magpaabot ko og "feedback" nga unta makorehean ang inyong mga pagkuwang. Isip mga opisyal sa barangay nga nagpapili aron "kuno" moserbisyo sa katawhan, atimana ang reklamo.

Sa pagpatuman sa balaod duna g'yoy maapektahan. Ang inyong kwentahon kon pila ka tawo ang makabenepisyo sa paghimo ninyo og aksyon, kon itandi sa pipila ra nga malipay kay gitugotan sila nga magparking sa karsada nga makamugna og problema sa trapiko.

Ang uban ra ba diha nga mga tag-iya og sakyanan, dili mauwaw nga ang ilang sakyanan nakamugna og problema sa trapiko. Kon magbaton gani kita og sakyanan, kinahanglang duna mo'y grahe.

Merry Christmas na lang.