Dec. 11-14, fine weather

Maayo ang panahon sa miaging December 11 hangtud 14. Dihay uwan-uwan, hinungaw ni Seniang, apan kutob ra sa signal no. 1 ang pasidaan sa Pag-asa. Generally, fine weather.

Apan, tungod kay ang mga foreign dignitaries, ang mga state leaders sa Asean, hadlok man mabasa, gi-uswag ang summit.

Nagpasalamat ang mga deboto sa Birhen sa Guadalupe tungod kay nabalik sa naandan ang schedule sa procession. Ug mi-prevail ang fine weather sa bisperas ug kahulogan sa piyesta sa Birhen sa Guadalupe de Cebu, ang patroness sa lalawigan sa Sugbo.

Unsaon, giisip man nga makasamok sa Asean summit ang piyesta sa Birhen, hinungdan nga gi-usab ang schedule sa procession. Maoy hinungdan nga nalipay ang mga deboto pag-uswag sa summit, tungod kay ang piyesta wa makasamok sa summit.

Karon, atol na pod sa pangilin sa Sto. Niño, ambut hain ang isipon nga makasamok, ang Sto. Niño ba, o ang Summit. Tungod kay daghan mang tawo sa Sugbo niining mga panahona, lagmit, hipuson ni Tomas ang mga tawo, aron dili makabalda sa Summit, di ba, ipauswag nila ang fiesta.

Anyway, si Akira Amari, Minister of Economy, Trade & Industry sa Japan, namahayag nga ang bag-ong schedule sa summit, makahatag og problema sa mga Asean leaders tungod sa ubang mga appointment ug mga commitment sa tuig 2007. Matud niya, tight kono ang ilang mga schedule, for the next six months.

Gumikan niini, lagmit i-call off na gyud for good ang summit dinhi sa Sugbo. Maoy atong panghinaut nga dili kini maoy mahitabo.

Sayang gyud kaayo. Kuyaw og di na mahinayon dinhi sa ato.

Sa ato pa, morag sayop ang pag-uswag sa schedule. Ug matud pa, for the first time kono sa kasaysayan sa Summit nga nauswag. Nga kon wa pa iuswag, humana ta ka ron, ug fine weather man ang Dec. 11-14.

What kon sa first week sa Enero, duna na say masiplatan nga laing bagyo? Don't tell me, i-postpone na pod. Rain or shine na lang gyud ang summit. Padad-on lang god silag mga kapote ug payong. Mga lider god na sila sa ilang nasud, hadlok silag uwan? Wa bay uwan sa ila, Dro?