EDITORYAL - Pasko: Yawe sa kalinaw

Hapit na gyud ang Pasko. Pila ka tulog na lang. Labing maayo kon sugdan na nato ang paghandom ug paghatag og gibug-aton sa bililhong mensahe sa Pasko.

Ang labing mahinungdanong mensahe sa Pasko mao ang gugma ug kalinaw.

"Love and peace," matud pa ni anhing Bishop Fulton Sheen, "are what Christmas is all about."

Mopakita kitag gugma ngadto sa atong isigkatawo kay diha sa gugma moresulta ang panaghiusa ug panagdait nga maoy yawe sa kalinaw.

Ang kalinaw maoy gikinahanglan aron masulbad ang kagubot ug kasamok nga giatubang sa kalibutan karon.

Gamiton nato ang Pasko isip dalan ngadto sa kasulbaran sa maong problema ug basin pa lang nga atong makab-ot ang kalinaw nga atong gitinguhang maangkon. -- Ann Las Cruces