EDITORYAL — Alang sa kadungganan sa Sugbo

Unom ka nagkalain-laing taxi nga akong nasakyan sa miaging semana pulos gidrayban og mga drayber nga limpiyo ang pamiste ug maayong pagkahinapay sa buhok.

"Paguwapo ta kay hapit na ang ASEAN Summit," matud sa usa. "Moingon unya si Sultan Bolkiah batig nawong mga Sugbuanon." Mikomedya siya. Si Bolkaih maoy hari sa Brunei.

"Gipalitan dyud ko sa akong asawa og puti nga polo para gamiton pang-drayb. Sa ukay-ukay niya ni palita. Pun-an pa kuno niya ni," matud sa laing drayber. "Kinahanglan kuno pabilib gyud ta sa mga bisita atol sa summit."

Ning duha ka pamahayag sa duha ka drayber sa taxi mipakita sa ila usab nga "concerns" alang sa nga'n sa Sugbo ug mga Sugbuanon atol sa ASEAN Summit.

Kitang tanan, sama ning duha ka taxi driver, kinahanglan nga mopakita sa atong pagkamaayong lungsoranon ngadto sa mga langyaw tang bisita.

Manghinaut kita nga ang "concern" nga gipakita niining duha ka drayber alang sa atong kadungganan anaa usab sa hunahuna ug kasingkasing sa ubang drayber.

Ang ASEAN Summit mihatag kanato og kahigayonan nga makapakita sa maayong kinaiya sa Sugbuanon.